Чи ватанэгьлияр — гьар сана
И мукьвара заз Азербайжандин Исмаиллинский райондин Къалажухрин хуьряй тир, алай вахтунда Дондал алай Ростов шегьерда яшамиш жезвай Рагьим Азизова вичин хуьруьнви жегьил алим, Бакуда яшамиш жезвай Раван Рагьимова илимдин рекье къазанмишнавай агалкьунрикай, дережайрикай ихтилатна.
Раван Абдуллетифович Рагьимов 1980-йисан 28-инюндиз Азербайжан Республикадин Исмаиллинский райондин Къалажухрин хуьре дидедиз хьана. 1986-1997-йисара ада хайи хуьруьн мектебда кIелна. 2001-йисуз Бакудин гьукуматдин университетдин химиядин факультет куьтягьна, гуьгъуьнлай гьа и вузда ада “Высокие молекулярные соединения” пешедай магистратурада кIелун давамарна. Чирвилер къачунин еке гьевес авай пешекарди 2003-йисуз магистратура тафаватлу дипломдалди куьтягьна. Тежрибани чирвилер мадни хкажунин макьсаддалди жегьилди рикIивай илимдал машгъул хьун кьетIна. ИкI, 2002-йисуз Раван Азербайжандин илимрин милли академиядин нафтIадинни химиядин институтдин лабораторияда илимдал машгъул жез гатIунна. 2003-йисуз гьа и институтдин аспирантурадик экечIна. 2007-йисуз агалкьунралди диссертация хвейи жегьил алимди химиядин рекьяй илимдин дережа къачуна. Къейд авун лазим я хьи, Россиядилай тафаватлу яз, бязи уьлквейра кандидатвилин диссертация хвейибуруз илимрин докторвилин тIвар гузва.
Уьмуьр хкягъай пешедиз бахш ийиз гьазур жегьил алим хьанвай агалкьунрал рази яз акъвазнач, адахъ мадни илимдин яцIариз гьахьдай мурад авай. ИкI, 2011-2015-йисара ада “НафтIадин химия” пешедай докторантурада кIелна ва вичин илимдин ахтармишунар пешекарри веревирдун патал нафтIадинни химиядин процессрин институтдин илимдин чIехи советдал агакьарна.
Илимдин рекье адахъ хейлин агалкьунарни хьана. 2011 ва 2014-йисара Раван Рагьимован илимрин проектар Азербайжан Республикадин президентдин гуьзчивилик квай илим еримлу авунин фондуни кьиле тухузвай жегьил алимриз, пешекарриз грантар гунин конкурсда гъалиб хьана.
2016-йисан октябрдин вацра Раван Абдуллетифовича “Синтез и анализ новых поверхностно-активных веществ на основе природных триглицеридов, пероксидов и (СЗ) эпоксидов” темадай кхьей диссертация хвена. Илимдин махсус советди жегьил алимдин ахтармишунин кIвалахриз еке къимет гана ва ам химиядин илимрин докторвилин чIехи тIварцIиз лайихлу хьана.
Р.Рагьимов илимдин 130-далайни гзаф кIвалахрин уртах авторрикай сад я. Адан къелемдикай 65 макъала хкатнава. Ам Азербайжан Республикадин 5 патентдин авторни я. Алимдин илимдин макъалаяр гзафни-гзаф къецепатан уьлквейрин (Германияда, Англияда, США-да, Кореяда, Малайзияда, Эфиопияда, Россияда, Украинада), гьакIни вири дуьньяда машгьур журналра чапдай акъатнава.
Алай вахтунда ада Бакудин инженерный университетда доцентвиле ва Азербайжандин илимрин милли академияда илимдин къуллугъчивиле кIвалахзава. Къуй лезги алим мадни кьакьан кукIушрив агакьрай!
К.Ферзалиев
