Чи ватанэгьлияр — гьар сана
Чеб яшамиш жезвай чкайра миллетдин тIвар анжах хъсан патахъай алемдиз раижзавай, жуьреба-жуьре хилера пешекарвилелди зегьмет чIугунилай гъейри, халкьдин тарихдиз, чIалаз, медениятдиз майилвалзавай, милли ивиррин къайгъударвалзавай ватанэгьлиярни чахъ тIимил авач. Москвада яшамиш жезвай Максим Жалиловни гьа ихьтинбурун жергедай яз гьисабиз жеда.
Максим 1958-йисуз Сулейман-Стальский райондин Испикрин хуьре дидедиз хьана. Хуьруьн юкьван мектеб, 1983-йисуз С. Орджоникидзедин тIварунихъ галай Москвадин управленидин институт (гилан ГУУ) куьтягьна. Институтда ада машиностроительный промышленностда АСУП-дин рекьяй (автоматизированная система управления предприятием) инженер-экономиствилин пеше къачуна.
Кьилин образование къачур жегьил пешекар Волгограддиз рекье туна. Ана Максим Керимхановича алатрин цехда устIарвиле кIвалахиз башламишна. Агъзурралди инсанри кIвалахзавай “Баррикады» объединенида ада 1987-йисалди устIарвиле зегьмет чIугуна, еке тежриба кIватIна. 1989-1991-йисара адакай механический цехдин, адалай кьулухъ 9-корпусдин (аник алатрин ва термический цехар акатзавай) начальник хьана. Эхиримжи йисара ана экономикадин анализрин отделдин начальник я.
1996-йисуз ада Россиядин гьукуматдин къвалав гвай халкьдин майишатдин академияда идара авунин рекьяй консультантрин мектебда, 2014-йисуз Санкт-Петербургда международный консалтинговый “АТМенеджмент” компанияда чирвилер къачуна. 1997-йисара кризисдиз акси (арбитражный) управляющий яз кIвалахна. 2000-2007-йисара вичи арадал гъайи компьютеррин “Глобалком-сервис” компаниядиз (ООО) регьбервална.
Эхиримжи са шумуд йисуз адакай (пенсиядиз фидалди) Москвада “Завод Электроприбор” ОАО-да маркетингдин отделдин начальник хьана. Алай вахтунда, бизнес-консультант яз, Москвада авай “Business EvoIution” (бизнес-эволюция) компанияда кIвалахзава.
Къейд ийиз кIанзава хьи, пешекар муаллим желб авуналди, Максим Жалилова интернетдин куьмекдалди лезги чIал чирунин кардикни, кьилди къачуртIа, вебинарар (онлайн-тарсар) тешкилуник вичин пай кутазва.
Адахъ кьве велед ва пуд хтул ава. Абур вири Волгоград шегьерда яшамиш жезва. Лайихлу ватанэгьлийрихъ сагъвал ва агалкьунар хьурай!
К. Ферзалиев
