10-ноябрдиз Дербент шегьердин администрациядин кьилин заместитель Жалалутдин Алирзаев шегьерда авай мискlинрин имамрихъ галаз гуьруьшмиш хьана. Гуьруьшда Дагъустан Республикадин муфтийдин заместитель Абдулла Аджимоллаевани иштиракна.
Жалалутдин Алирзаева Дагъустан Республикадин Муфтиятдин къуллугъчийри гьар жуьре месэлайрай, гьа жергедай яз терроризмдизни экстремизмдиз акси яз кьиле тухузвай кlвалахдикай суьгьбетна. Гьял тавунвай месэлаярни амайди лагьана. Кьилди къачуртlа, им мис-кlинрин имамри чпи-чпин арада сих алакъаяр аваз кlвалах тавун я. Ада имамриз санал кlвалахуниз эвер гана.
Абдулла Аджимоллаева кlватl хьанвайбурун фикир къенин юкъуз имамривай ийизвай истемишунрал желбна. Эвелни-эвел диндин тешкилатар регистрация авуна куьтягьун, вири мискlинар РД-дин юстициядин министерствода регистрация авун, абурун уставарни уьлкведин къанунрихъ галаз кьун лазим тирди лагьана. Кьилин истемишунрик гьакlни цlаяр кьуникай хуьнин, михьивилер авунин къайдайрал амал авунин, гьакlни бухучет кьиле тухунин важиблу кlвалахарни акатзава.
Абдулла Аджимоллаева имамриз са жерге маса меслятар, теклифарни гана.
Гуьруьшдин нетижаяр кьур Ж.Алирзаева имамриз къарагъарнавай месэлайрив рикlивай эечlуниз эвер гана.
Къагьриман Ибрагьимов
