Са тIимил йикъар идалай вилик Махачкъалада, “Дагъустанда ЦIийи йисан вилик гуьруьшар” фестиваль-форумдин сергьятра аваз, “Медениятдин муькъвер. Адетар ва алай аям” конференция кьиле фена.
Форум-фестивалдин тешкилатчияр РФ-дин культурадин министерство, РД-дин культурадин министерстводин иштираквални аваз Россиядин культурадин фонд ва республикадин халкьдин яратмишунрин КIвал (РДНТ) тир. Ана РД-дин культурадинни искусстводин деятелри, адетдин культурайрин центрайрин директорри, МР-рин культурадин управленийрин регьберри, яратмишунардай коллективрин иштиракчийри, культурадин идарайрин къуллугъчийри ва масабуру иштиракна.
Конференциядал “Культура” милли проектдин сергьятра аваз муниципальный тешкилатра культурадин идарайрин кIвалахдиз ва сад-садахъ галаз алакъа аваз кIвалахуниз, республикадин “Дагъустан Республикада культура вилик тухун” госпрограмма кьилиз акъудуниз, Россияда театрдин Йисаз талукь месэлаяр веревирдна.
Мярекат ачухай РД-дин культурадин министр Зарема Бутаева “Культура” милли проектдикай (кьилинбур яз къалурнавай месэлайрикай — регионрин культура вилик тухун, гьа гьисабдай яз бажарагъ авай жегьилриз куьмек гун, клубрин кIвалах хъсанарун, халкьарин адетдин культурадин ирс хуьн ва икI мад) рахана. Ада театрдин Йисуз халкьдин театррин иштираквал аваз муниципальный, региональный ва международный дережадин 100-далай виниз художественный проектар ва яратмишунрин серенжемар кьилиз акъудайдал фикир желбна. Къведай йис РФ-дин Президент Владимир Путинан указдалди рикIел хуьдай ва баркаллувилин Йис яз малумарнавайди, саналди юбилейриз талукь са жерге мярекатар кьилиз акъудун лазим тирди къейдна. РДНТ-ди ва Р.Гьамзатован тIварунихъ галай Милли ктабханади саналди методикадин пособие туькIуьрнавайди раижна.
РД-дин культурадин министрдин заместитель, РДНТ-дин директор Марита Мугьадовади республикадин халкьдин яратмишунрин КIвали 2019-йисуз кьиле тухванвай мярекатрикай (вири — 223, абурукай 3 халкьарин уртах проектар — “Адетрин театр”, “Дагъвияр”, “Къугъугъ, руьгь!”) доклад авуна. И проектрин сергьятра аваз жуьреба-жуьре жанрайрин фестивалар, килигунар, конкурсар, концертар, суварар, мастер-классар, семинарар ва икI мад тешкилайдал фикир желбна.
Конференциядин сергьятра аваз МО-ра культурадин идараяр террористрикай хуьниз, кинозалрин кIвалахдиз, хуьрерин культурадин кIвалер цIийикIа туьхкIуьр хъувуниз, гьакIни культурадин хилен къуллугъчийрин пешекарвал хкажуниз талукь ва мадни са жерге месэлаяр веревирдна.
Чи мухбир
