Россиядин Федерациядин экономика вилик тухунин министерстводи кьулухъ галамай са бязи регионриз, шегьерриз куьмек гунин мураддалди яшайишдинни экономикадин рекьяй гзаф йигин еришралди вилик фидай программа туькIуьрнава. Дагъустан Республикадайни и программадик са шумуд чка акатнава, гьа гьисабдай яз Дагъустандин Огни шегьерни.
И йикъара РД-дин Гьукуматдин Председателдин сад лагьай заместитель Гьажимегьамед Гьуьсейнован регьбервилик кваз Дагъустандин Огни шегьерда яшайишдинни экономикадин рекьяй гзаф йигин еришралди вилик тухунин кIвалахар гъиле кьунихъ галаз алакъалу икьрарар кутIунуниз талукь комиссиядин заседание кьиле фена.
Аме ачухунихъ галаз сад хьиз Гь.Гьуьсейнова къейдна хьи, Россиядин экономика вилик тухунин министерстводин, Дагъустан Республикадин ва Дагъустандин Огни моношегьердин администрацийрин арада кутIуннавай икьрардин бинедаллаз 20 миллион манатдин кьадарда аваз инвестицияр авай пуд резидент кIвалахал желб авун лазим я. Абуру шегьердани 30 касди кIвалахдай алава чкаяр арадал гъун герек я.
Гь.Гьуьсейнова малумарайвал, Дагъустандин экономикадин рекьяй вилик тухунин министерстводи ва Дагъустандин Огни шегьердин администрацияди санал тухузвай кIвалах бегьерлуди жезва. Администрациядин вилик эцигнавай везифаяр кьилиз акъудзава. Комиссиядин заседанидал инвестицийрин кьуд проектдиз килигнай. Абурукай кьвед территорияр яшайишдинни экономикадин рекьяй гзаф йигин еришралди вилик тухудай резидентрин реестрдик кутунва. Муькуь кьведан гьакъиндай материалар Россиядин экономикадин рекьяй вилик тухудай министерстводиз рекье тунва.
— Чи макьсад территорияр вилик тухудай резидентар регистрация авун ва и кардал гзафбур желб авун туш. Кьилинди проектар уьмуьрдиз кечирмишун, шегьерда кIвалахдай алава чкаяр арадал гъун я, — лагьана Гь.Гьуьсейнова.
Шегьердин экономика вилик тухуник чпин пай кутаз кIанзавайбурук логистикадин “Транстрейд” компаниядин учредитель Абдурашид Хизриевни акатзава. Адаз шегьерда жуьреба-жуьре товарар ва парар инай-аниз тухунин карда куьмек гудай сад тир логистикадин центр арадал гъиз кIанзава. Ида Дагъустан Республикадин кьиблепатан районриз экономикадин ва яшайишдин рекьяй вилик финиз куьмек гуда.
Проект уьмуьрдиз кечирмишай сифте кьиляй центрада 10 касдиз кIвалахдай чкаяр жеда. Абурув юкьван гьисабдалди гьар вацра 21,5 агъзур манат агакьда. Проект тамамвилелди кьилиз акъудайла, Дагъустан Республикадин бюджетдизни йиса 2,7 миллион манат къведа.
Абдурашид Хизриева хиве кьурвал, и проект уьмуьрдиз кечирмишуни бизнесдин маса идеяярни кьилиз акъудиз куьмекда.
Дагъустандин Огни шегьерда республикада сифтебурукай сад яз “Зи Дагъустан — зи рекьер” проектдин сергьятра аваз аваданламишунин кIвала-хар акьалтIарнава. Шегьердин культурадин дараматдин къвалав гвай парк ва гьаятар цIийикIа туькIуьр хъувунва. И кардилай шегьерэгьлийри пара разивалзава.
Хийир Эмиров
