Мегьарамдхуьруьн район алай йисуз республикадин яшайишдин важиблу мад са проектдин иштиракчи хьана. Ам чкадилай къвезвай теклифрин тереф хуьнихъ элкъуьрнавайди я.
12-декабрдиз райондин кьил Фарид Агьмедов вичин сад лагьай заместитель Гьабибуллагь Мурадалиевахъ галаз и проект уьмуьрдиз кечирмишзавай гьалдихъ галаз таниш хьун патал Хъартас-Къазмайрин хуьруьз фена.
Ина проектдин сергьятра аваз 4 куьчеда къир цазва. Алай вахтунда са кьадар кIвалахар авуна куьтягьнава. Кьилди къачуртIа, В.Эмирован тIварунихъ галай куьчеда къир цана куьтягьнава ва А.Алиеван тIварунихъ галай куьчеда къир цаз башламишнава. КIвалахар пудратдин организацияди — “Прогресс” ООО-ди кьиле тухузва. Проектдин къимет 3,350 миллион манатдилай гзаф я.
Ф.Агьмедов кIвалахар кьиле физвай гьалдихъ галаз таниш хьана ва и кардик кьил кутунвай дестедин векилрихъ галаз рахана. “Чкадин теклифар” программа общественный уьмуьр къулайди авун патал мад са хъсан мумкинвал я. Адан кьилин мурад гражданар чкадин метлеб авай месэлаяр гьялунал, общественный къурулуш вилик тухунал желб авун я. И участокда кIвалахар хъсан еришар аваз кьиле физва”, — къейдна райондин кьили.
«Лезги газет»
