Са тIимил йикъар идалай вилик Дербентда Виридуьньядин милли культурайрин ва искусстводин  “WORLD FOLK VISION” (WFV) фестиваль-конкурсдин иштиракчияр хкягъуниз талукь яз Россиядин мил­ли конкурсдин региондин пай  кьиле фена. Серенжем къадим Дербентда кьиле тухуз им гила кьвед лагьай йис я. И паюна гъалиб хьайибуру къведай йисан январдиз Сочи шегьерда кьиле фидай Россиядин чемпионатдин финалда чпин алакьунар къалурда. Ахпа — винидихъ тIвар кьунвай фестиваль-конкурсда…

Алатай гьафтеда Махачкъалада, “Дагъустандин правда” газетдин конференц-залда кьиле фейи гуьруьшдал и серенжемдин макьсаддикай ва Дербентда кьиле фейи паюникай адан тешкилатчийри — мугьманри суьгь­бетна. Абурун арада авай:  Жанна  Берсегова — фестиваль-конкурсдин председатель ва ЕОЭС-дин (Ев­разийская организация экономических содружеств) куль­турадин рекьяй комиссар; Разита  Мушидова — фестиваль-конкурсдин председателдин заместитель; Индира Бадияр — дизайнер,  фестиваль-конкурсдин сергьятра мо­да­дин­ хилен регьбер; Сафижат  Ме­гьа­­медрасулова — фестиваль-кон­курсда Дагъустандин патай векил­.

Къейд авун лазим я хьи, винидихъ тIвар кьунвай серенжемдин макьсад дуьньядин халкьарин культураяр хуьн ва абур машгьурун  я.  Ина жуьреба-жуьре культурайрин ве­килри иштиракзава, кьуьлерни ма­нияр тамамарунай, декоративно-прикладной искусстводайни музалатрал къугъунай ва модадин дизайнерри чпин устадвал къалурзава.

Гуьруьшдал мугьманри авур суьгьбетдай малум хьайивал, алай вахтунда дуьньядин 80-далай виниз уьлквейра и серенжемдиз хкядай паяр кьиле физва. Анра гъалиб хьайи­буру дуьньядин “WORLD FOLK VISION” фестиваль-конкурсдин финалда иштиракда. Ам ла­гьай­тIа, адет хьанвайвал, Саудов­ский Аравиядин Эр-Рияд шегьерда кьиле тухузва. Ана иштиракун патал такьатар  (рекьериз, тIуьниз ва яшамиш хьуниз талукь) и пачагьлугъди ва “WORLD FOLK VISION” фес­тиваль-конкурс тешкилунин комитетди чпин хивез къачузва.

— Алай йисан мартдиз кьиле фейи финалдин мярекатар дуьньядин 100-далай виниз уьлквейра телевизоррай къалурна, идалди ТВ-дин тамашачияр дуьньядин са шумуд цIудралди халкьарин культурайрихъ галаз танишарна.  Россиядин патай ана 7 региондин, гьа гьисабдай яз Дагъустандин ва Башкортостандин векилри иштиракна. Кьве республикадин яратмишунардай коллективрин делегациярни фестиваль-конкурсдин Гранд-Финалдиз акъатнай, — рикIел хкана Жанна Берсеговади.

ИкI, Дербентда кьиле фейи паюна цIи 750 коллективди иштиракна. Абурун арада фадлай машгьур­бур хьиз, чпикай са артух хабар ава­чир коллективарни авай. Университетрин муаллимрикай, искусстводин ва медениятдин хиле яргъал йисара зегьмет чIугвазвай ва тIвар-ван авай машгьур ксарикай ибарат жюридин членар патал абурукай виридалайни хъсанбур хкя­гъун­ еке имтигьандиз элкъвена, гьикI хьи, коллективрихъ гьар садахъ ус­тадвал, сад-масадаз ухшар тушир кьетIенвал… надирвал авай.

Нетижада къведай вацра Сочидиз фидайбурун жергеда гьатна: “Лезгинка” ансамбль, Кубачидин ус­тIарар (кьве кас), камаллу жигитрин (абур халкь­дин музалатрални къугъвазва) хор.

Гуьруьшдал мугьманри гележегдин планрикайни суьгьбетна, кьилди къачуртIа, фестиваль-конкурсдин сергьятра аваз ам кьиле тухузвай чкайра Дагъустандин халкьдин сеняткарвилин шейэрин мекераярни тешкилда ва икI мад.

Рагнеда Рамалданова