Алатай гьафтеда Махачкъалада тарихдин “Урусат — зи тарих” тIвар алай паркунин дараматда лезги чIалал акъатзавай “Ас-салам” газетдин 20 йис тамам хьуниз талукьарнавай мярекат кьиле фена.
Редакциядин коллективдиз и вакъиа мубаракиз атанвайбурун арада РД-дин милли сиясатдин ва диндин крарин рекьяй министр Энрик Муслимов, РД-дин госзакупкайрин Комитетдин председатель Жафар Гьажибегов, Дагъустандин Муфтиятдин председатель Абдула Салимов, “Лезги газетдин” кьилин редактор Мегьамед Ибрагьимов, ДГПУ-дин профессор Шайдабег Мирзоев, Кьиблепатан Дагъустанда РД-дин Муфтийдин векил Гьуьсейн Гьажиев, диндин, жемиятдин векилар ва масабур авай.
Мярекат нашидрин устад Заур Салигьова Къуръан кIелунилай гатIунна.
Гуьгъуьнлай сегьнедиз экъечIайбуру чпин рахунра лезги чIалал “Ас-салам” газет арадал атуникай, адан макьсадрикай, агалкьунрикай чпин фикирар лагьана, газетди руьгьдин ивирар раиж авунилай гъейри, халкьарин арада дуствал мягькемаруник, милли меденият, хайи чIал хуьник кьетIен пай кутазвайди къейдна.
Газетдин юбилейдиз талукьарнавай межлисдин сергьятра аваз Заур Салигьова, “Нашидуль Ислам” ва “Хайрат” дестейри араб, урус, лезги чIаларал нашидар, шиирар кIелна.
Мярекатдин эхирдай “Ас-салам” газет кIелзавайбурув ахгакьарзавайбурув, жуьреба-жуьре йисара газетдин редакцияда кIвалахайбурув шабагьар вахкана. “Ас-салам” газетдин редакция Дагъустандин милли сиясатдин ва диндин крарин рекьяй министерстводин патай Гьуьрметдин грамотадиз лайихлу хьана.
“Лезги газетдин” редакциядин коллективди лезги чIалал акъатзавай “Ас-салам” газетдин кьилин редактор Гьасан Амахановаз ва редакциядин коллективдиз газетдин 20 йис тамам хьун мубаракзава. Къуй квехъ дин, руьгьдин ивирар, хайи чIал хуьнин карда мадни еке агалкьунар хьурай!
Агьмед Магьмудов
