КНР-дин Гуанчжору шегьерда 7-сеферда Россиядинни Китайдин жегьилрин гатун къугъунар кьиле фена. Акъажунрин программадик волейбол, баскетбол, цин поло, дзюдо, бокс, азаддиз ва грекринни римлуйрин жуьреда кьуршахар кьун, ушу, художественный гимнастика, столдал къугъвадай теннис квай. Им 2006-йисалай чи халкьарин дуствилин алакъаяр мягькемарун, спортдин адетар виликди тухун, жегьил спортсменрин устадвал хкажун, абуруз руьгьдин ва физический тербия гун патал гагь Россияда, гагь Китайда кьиле физвай спортдин мярекат я.

Ругуд йикъан вахтунда 217 спортсменди медалрин 72 комплект патал бягьсер чIугуна.

Азаддиз кьуршахар кьунай Россиядин хкягъай командадик квай вадакай кьве пагьливан чи ватанэгьлияр — ахцегьвияр Асвар Палчаев (63 кг.), Бегхан Мисриханов (76 кг) тир.

Китайдин чилел дагъвийри чпин алакьунар къалурна, вири акъажунра кьведни гъалиб хьана. Къизилдин медалрин сагьибар райондин кьил Осман Абдулкеримова тебрикна.

Дагъви Шериф