Са тIимил йикъар идалай вилик Ахцегьа, А.Гъаниеван тIварунихъ галай аялринни жаванрин спортшколада (ДЮСШ), сагълам уьмуьр пропаганда авуниз ва акьалтзавай несилдиз ватанпересвилинни эдебдин тербия гуниз талукьарна, са жерге серенжемар кьиле тухвана.
ИкI, ДЮСШ-дин директор Марсел Гьажиеван теклифдалди экстремизмдинни терроризмдин вилик пад кьуниз талукьарна кьиле тухвай серенжемда Ахцегь райондин дидин къуллугъчийрин векил Ширинбег Мирзоева, “сельсовет Ахтынский” СП-дин кьил Низами Эфендиева, участковый уполномоченный Мирзекерим Мирзекеримова, Ахцегь райондин общественный палатадин председатель Али Исмаилова ва масабуру иштиракна.
-Терроризмдиз сергьятар авач, жуьреба-жуьре яшарин векилар адан къурбандриз элкъвезва. Тапан эвер гунри асул гьисабдай жегьилар рекьелай алудзавайди гьисаба кьурла, и мярекатдин менфятлувал екеди я. Чи буржи акьалтзавай несил чIуру завалрикай, таъсирдикай хуьн я. И рекье чахъ хъсан нетижа хьун патал чIуру крарихъ галаз женг чIугун герек къвезва. Чи райондин, республикадин ва уьлкведин гележег пака квелай аслу я эхир, — къейдна М.Гьажиева.
Мярекатдал рахай амай ксарини жегьилри тарс хкуддай хьтин суьгьбетар авуна, насигьатар гана.
Винидихъ тIвар кьунвай серенжемрик кваз, гьакIни районда футбол машгьурунин макьсаддалди А.Гъаниеван ДЮСШ-да тренеррин-муаллимрин — Артём Мирзоеван ва Камил Гьажиеван (КьакIарин хуьр) — гъилик вердишвилер къачузвай жегьилрин арада футболдай дуствилин къугъунни кьиле тухвана.
Рутул ва Мегьарамдхуьруьн районрин, гьакIни 2-нумрадин ДЮСШ-дин (Луткунрин хуьре кардик квай) спортсменрин иштираквал аваз азаддаказ кьуршахар кьунай кьиле фейи акъажунар — дуствилин гуьруьш иллаки итижлуди, бягьсерни къизгъинбур хьана.
Регина Семедова
