И йикъара, чи райондин алакъадин отделенидиз фена, 2020-йис патал “Лезги газет” кхьена, кIвализ хтайдалай кьулухъ заз жува нубатдин сеферда хиве авай ватандашвилин буржи тамамарайди хьиз хьана.
“Лезги газетдихъ” галаз зи алакъа лап фадлай ава, школада кIелзавай йисарилай. Гзаф месэлайрикай, крарикай, вакъиайрикай хабар гузвай газет чи кIвале кхьин тавур йис хьайиди туш . Сифте бубадин кIвале, ахпа, гьана адет хьанвайвал, жуваз хизан хьайилани, и кар давамар хъувуна. Умудлу я хьи, и хъсан ва ватанпересвилин адет гележегда зи балайрини давамарда. ГьакI жедайдал зун шаклуни жезвач.
Газет кхьизвай гьар садаз малум кар я: ам хтун гьар гьафтеда виливни хуьзва ва ашкъидалди кIелни ийизва. Газет кIелайла, чав лезги чилел, Дагъустанда ва гьакI вири уьлкведа, гьатта дуьньяда авай хабаррикай малуматар агакьзава. Газет себеб яз, заз чи миллетдин тарихдикай, адан баркаллу рухвайрикайни рушарикай гзаф малуматар чир хьана. Къе за а делилрикай жуван веледриз ахъайзава. Абуруз чпин бинейрикай, тарихрикай чир хьун лазим я эхир.
Къанни сад лагьай асир телевиденидинди, интернетдинди, цифровой технологийринди яз гьисабзаватIани, газет чаз мукьва я, иллаки — жуван дидед чIалал акъатзавайди. Ам кIелун хуш ва итижлу я. Гьавиляй за “Лезги газетдихъ” галаз садрани алакъа атIудач.
За газет кхьиниз жуван хуьруьнвийриз, районэгьлийриз, дишегьли — диде яз, вири дидейриз эвер гузва. Газетдин юбилейдин йисуз — виниз тир тираж! “Лезги газет” чи балайриз хъсандиз хайи чIал чир хьунин карда важиблу такьатрикай сад я.
Гьуьрметлубур, я зун, я зи итим вацра-вацра мажиб къвезвай кIвалахдин иесияр туш, я карчияр, бизнесменарни. Амма жуван чIалал акъатзавай, чаз багьа тир милли газет кхьин патал герек къвезвай кьадар пул (са ведро шуьмягъар) чаз гьайиф атанач.
Заз чи багъри газетдин коллективдихъ яратмишунрин рекье мадни ва мадни агалкьунар хьана кIанзава!
Тамила Салманова,
Мегьарамдхуьруьн район
