Дагъустандин Кьил Владимир Васильева тухвай нубатдин совещанидал налогар гун тийизвай вири ксар кIвалахдилай алуддайдан ва уголовный жавабдарвилиз чIугвадайдан патахъай тагькимарна.
“Гила чна чпин чIехи дараматар лазим тир гьалда учетда эциг тавунвай ксарихъ, гьакIни газдикай, электричестводикай ва цикай менфят къачуз, гьа са вахтунда контролерриз ришветар гунилай гъейри маса пулар ерли гун тийизвай бизнесменрихъ галаз кIвалах тухуз башламишда. Регьбервал гудай къуллугърал алай ксар за гьеле тагькимарайди я: налогрин рекьяй учетда авачир имаратра яшайишдин жигьетдай ийизвай къуллугърикай менфят къачунин кIвалах тешкилнавайбур чна жавабдарвилиз чIугвада. И месэлаяр чна кIевелай гъиле кьазва ва галай-галайвал гьялда. И кIвалах заправкайриз талукь яз гьикI кьиле тухванатIа, гьакI тешкилнайтIа кIанзавай. Чахъ заправкадин 58 комплекс ава. 2018-йисуз чалай абурувай къачузвай налогрин кьадар 20 процентдин артухариз алакьна”, — лагьана региондин руководителди.
Адан гафаралди, гьа ихьтин кIвалах кIвачин къапар цвазвайбурухъ галазни тухуда. “Са тIимил вахтарилай чна кIвачин къапарал чипар эцигда. КIвачин къапар гьазурзавай хейлин ксар чеб чпелай “хъендикай” хкечIзава, чпиз налогрин ва маса жуьрейрин кьезилвилер ийидай рекьерихъ къекъвезва. Ахьтинбуруз чна куьмек гуда. Чиновникар ва абурун гъилик квай ксар чеб чпелай учетда акъвазайтIа, чна гьабурузни куьмекар гуда. Исятда чаз герекзавайди инсанар дустагъ авун туш. Чна хейлин месэлаяр, гьа гьисабдай, мектебрихъ галаз алакъалу месэлаяр гьялун патал республикадин бюджет ахцIурдай рекьер жагъурун герек я. Аялриз дуьзгуьн шартIар тешкилиз тежезвай халкьдин ва гьукумдин къимет гьихьтинди хьурай?”, — малумарна Владимир Васильева.
АЗС-рин кIвалахдикай рахадай чIавуз ада “хъендикай” хкечIнавай заправкадин комплексрин руководителрихъ галаз икьрарар кутIуннавайди ва абуруз налогар къачуниз талукь сертификатар ганвайди рикIел хкана. “Месэладин патахъай чна прокуратурадихъ ва маса къурулушрихъ галаз меслятар авуна ва чна хьанвай икьрардал амал ийида, вучиз лагьайтIа заправкайрин иесийри налогар гузва, гьакI хьайила, нубат алазни, алачизни абур кIевера тунин чарасузвал авач. Налогар гун тийизвайбуруз талукь месэладай чна кьил акъудда. Налогар гузвайбуруз лагьайтIа, куьмекда, гьикI хьи, общество вилик финин асул бине тир налогар гузвайбур хуьн — им гьукумдин вилик акъвазнавай везифа я”, — лагьана республикадин Кьили. Ада къейд авурвал, им ян тагана тухудай, гьина лазимвал аватIа, гьана кIеви истемишунар авуналди тухудай кIвалах я, гьина инсанар месэладин гъавурда акьазватIа, абуруз вири жуьрейрин куьмекар гуда.
Республикадин руководитель инанмиш тирвал, кьабулзавай серенжемрин нетижада йисан къене бюджетдиз къвезвай доходрин кьадар артух жеда. Идалайни гъейри, гьеле исятда бюджетди шаз гьялиз хьайидалай гзаф месэлаяр гьялдай мумкинвал гузва.
«Лезги газет»
