Алатай гьафтеда Мегьарамдхуьруьн райондин кьил Фарид Агьмедов райондин депутатрин собранидин председатель Абубакар Ханмегьамедовахъ ва райондин кьилин сад лагьай заместитель Гьабибуллагь Мурадалиевахъ галаз санал больницадиз мугьман хьана. Идакай “Лезги газетдиз” муниципалитетдин администрациядин пресс-къуллугъди хабар гана.
Абур идарадин дарамат авай гьалдиз килигна ва отделенийрин кIвалахдихъ галаз мукьувай таниш хьана. Больницадин кьилин духтур Гьажибала Беглерова райондин руководстводиз рентгендин кабинетда алай вахтунда ремонтдин кIвалахар кьиле физвайдакай лагьана. Адан гафарай малум хьайивал, ремонтдилай кьулухъ кабинетда вири рекьерай къулай шартIар арадал къведа.
Фарид Агьмедова дараматда санитариядин, больница лазим тир дарманралди таъминарзавай гьалариз, кабинетра авай медицинадин техникадиз кьетIен фикир гана. Ада къейд авурвал, больницада авай шартIарилай медицинадин рекьяй ийизвай къуллугърин ери аслу я.
Фарид Агьмедова Гьажибала Беглеровахъ галаз санал больница алай мулкунал ремонтдин ва эцигунрин кIвалахар кьиле тухунин месэлани веревирдна. Кьилди къачуртIа, больницадин мукьварив машинар акъвазардай махсус майдан эцигун пландик ква.
РикIел хкин, алай йисан сентябрдин эхирра Мегьарамдхуьруьн райондиз Дагъустан Республикадин чилерин, эменнидин алакъайрин ва алишверишдин месэлайрин рекьяй министерстводин къуллугъчияр мугьман хьайила, райбольницадин кьилин духтурдин заместитель Алзира Шириновади абуруз поликлиникадин дарамат куьгьне хьанвайдан, ана хъсан еридин къуллугъар ийиз четин жезвайдан ва цIийи дарамат эцигунин игьтияж авайдан гьакъиндай хабар ганай. Меркездай атанвай жавабдар къуллугъчийри Мегьарамдхуьруьн районда авай са жерге месэлайрихъ галаз и месэлани гьялдай къарар кьабулун патал РД-дин Гьукуматдиз махсус справка рекье твадайдакай лагьана.
Агьмед Магьмудов
