Алатай девирра гьар жуьредин себебар аваз агъзурралди дагъустанвияр кIваливай-къавай яргъариз, гьатта къариблух уьлквейризни акъатай дуьшуьшар хьанай. Абурун арада гзаф кьадар лезгиярни авай. Кавказдин, урусринни туьркверин арада кьиле фейи дявейрин вахтунда Курхуьрелай Туьркиядиз Гьажимурад лугьудай кас акъатнай. Хуьре адан кесиб хизан-пабни аялар амукьнай. Туьркияда ам Балакесир вилаятдиз акъудна. Вичик са бубат агьвал акатайла, ам эвленмиш хьана. Гьажимурад Ортажа лугьудай са гъвечIи хуьре бинеламиш хьанвай. Йисар алатна, хизан арадал атана, 4 гада чIехи хьана.

Курхуьрелай Туьркиядиз акъатай Гьажимурадан птул Селягьатин Ат­маж алай вахтунин мумкинвилерикай мен­фят къачуналди, мукьвара, яни 17-октябрдиз, вичин дахдин, бубадин багърийрал кьил чIугваз хтанвай.

Хуьруьз хкведалди ам Сулейман-Стальский райондин кьил Абдулмуталибов Наримана кьабулна. Абурун арада лезги халкьдикай, яшайишдикай, чIа­ларикай, Ортажа хуьруькай суьгьбет кьиле фена.  Атмажахъ вичин къунши, Рухунай тир Шен Гьаятддинни галай. Кьведни михьи лезги чIалал рахазвай.

Ахпа Атмажанни Шен Курхуьрел хтана. Ина Мирзекирим Рагьимован тIварунихъ галай 1-нумрадин юкьван мектебда мугьманар муаллимри, аялри шаддиз, иситIани фу гваз къаршиламишна. Ина кьиле фейи гуьруьш мектебдин директор Гьасанбегов Мегьамедкерима ачухна. Селягьатина чеб икI кIа­ни­вилелди, гьуьрметдивди къаршиламишунай сагърай лагьана ва вичин чIехи буба Туьркиядиз гьикI акъатайди ятIа (дя­ведин йисара), чпикай ана гила вужар аватIа, гьадакай 83 кIвал авай Ортажа хуьре авайбур вири лезгияр тирдакай, чпи лезги адетар вири кьиле тухузвайдакай, ички алачир мехъерар ийизвайдакай, вичин 6 веледдикай, абурун кIвалахрикай, дуствилелди яшамиш жезвай хуьруьнбуру сада-садаз куьмекар гузвайдакай суьгьбетна.

Мугьмандин миресрикай анал А.Аливердиева, С.Исмаилов, И.Мирзебалаев, муаллим Г.Межидова ва и цIарарин автор рахана. Аялри — гъвечIи артистри ма­нияр лагьана, кьуьлер авуна. Эхирдай Селягьатиназни Гьаятддиназ мектебдин лезги чIаланни литературадин муаллим Гуьзел Межидовади рикIел аламукьунин лишан яз “Лезгистан”, и цIа­рарин авторди вичин “Курхуьруькай ва адан агьалийрикай тарихдин очеркар” ктабар багъишна. Эхирдай вирида рикIел аламукьдай шикилар яна.

Райсудин Набиев