14-ноябрдиз Сулейман-Стальский районда Дагъустан Республикадин хуьруьн майишатдин ва суьрсетдин министрдин заместитель Шамил Алиеван председателвилик кваз субсидияр, кредитар гунин ва грантар къачунин месэлайрай семинар-совещание кьиле тухвана.
Адан кIвалахда райондин администрациядин кьилин 1-заместитель Лацис Оружева, РД-дин хуьруьн майишатдин ва суьрсетдин министерстводин ва россельхозбанкдин къуллугъчийри, пешекарри, хуьруьн майишатдин ва суьрсетдин управленийрин ва отделрин начальникри, РД-дин Кьиблепатан территориальный округдин районрин КФХ-рин, СПК-рин руководителри ва СМИ-рин векилри иштиракна.
Дагъустан Республикадин хуьруьн майишатдин ва суьрсетдин министрдин заместитель Ш.Алиева хуьруьн майишат вилик тухунин рекьяй государстводин программада планламишзавай дегишвилерин гьакъиндай малумат гана. Кьилди къачуртIа, ада государстводин куьмек гунин менфятлувал хкажуниз талукь, яни 2020-йисалай къуватда гьатдай эвездин ва гьевесламишдай субсидияр чара авунин месэлайрикай лагьана.
“Субсидияр чара авунин жигьетдай агропромышленный комплексдин гьевесламишдай агъадихъ галай хилер кар алайбур жеда: техилдин ва техилдинни пахлайрин жинсинин магьсулар, гъери хкуддай набататар, ачух чкадал салан майваяр битмишарун, уьзуьмлухар кутун вилик тухун, емишрин продукция, канабар, нек, якIун малдарвал, хипехъанвал, майишатрин куьлуь жуьреяр вилик тухун. Бес кьадар государстводин куьмек галачиз федеральный “АПК-дин продукция къецепатан уьлквейриз маса гун” законди тайинарнавай месэла гьялиз четин жеда”, — лагьана ада.
Россельхозбанкда кредитрин политикада авай дегишвилерин гьакъиндай Россельхозбанкдин Дагъустанда авай отделенидин муьштерийрихъ галаз кIвалахунин рекьяй отделдин начальник Намик Абдулаева малумат гана.
Ахпа семинар-совещание рахунрин къайдада кьиле фена — Кьиблепатан территориальный округдин районрин векилри теклифар, меслятар ва чпи итиж ийизвай месэлайрай суалар гана. Суалар хуьруьн майишатдин метягьар гьасилзавайбуру конкурсра иштиракуниз, сар маса гуниз, багълар кутуниз, гьайванар санай масаниз тухуниз, кредитар ва субсидияр къачуниз, хуьрера жуьреба-жуьре госпрограммайрай яшайишдинни культурадин дараматар эцигуниз талукьбур тир. Къарагъарай вири месэлайрай жавабар гана.
Райондин администрациядин кьилин 1-заместитель Лацис Оружева Дагъустан Республикадин хуьруьн майишатдин ва суьрсетдин министрдин заместитель Шамил Алиеваз тухвай гуьруьшдай сагърай лагьана.
«Лезги газет»
