19-ноябрдиз Ахцегь райадминистрациядин залда райондин активдин нубатдин совещание хьана. Сифте гаф рахуналди ва йикъан месэлаяр раиж авуналди, ам райондин кьилин заместитель Мегьамед-Рауф Гъаниева ачухна ва кьилени тухвана.
Сифте месэладай муниципалитетдин экономикадин отделдин начальник Мегьамед Касимова къейд авурвал, алай вахтунда (11 вацран муддатда) райондин налогрин пландин тапшуругъар эменнидай 93 ва чилин налогдай 80 процентдин тамамарнава. Чилер ва капитальный эцигунар (ОКС) актуализироватунай планар, талукь тирвал, 52 ва 107 процентдин ацIурнава. Законсуздаказ кIвалахзавайбур ГНИ-дин учётда тунал алахънава.
Йикъан 2-месэладай гаф райондин “ЦIийи дуьнья” газетдин редактор тир и цIарарин авторди къачуна. — Гьуьрметлу юлдашар, алайди 2020-йисан подпискадин азгар вахт я. 25-декабрдалди чна райондин “ЦIийи дуьнья”, республикадин “Лезги газет” ва “Дагъустандин правда”, гьакI маса газет-журнал кхьена кIанзава. Райондин чин — гуьзгуь тир “ЦIийи дуьнья” ва чи халкьдин печатдин орган “Лезги газет” (къведай йисуз адан 100 йисан юбилей къейдзава) гьикьван гзафбуру кхьейтIа, гьакьван хъсан я. Гьар йикъан цIийи-цIийи хабарарни малуматар гунилай гъейри, милли прессади лезги чIал, тарих, культура, адетар хуьнин, виликди тухунин, акьалтзавай несилар ватанпересар яз тербияламишунин карда еке роль къугъвазва, — лагьана ада.
— Газетар, журналар кхьин тешкилунин кIвалах регьятди туш. Гила, мажибар карточкайрин къайдада гузвайла, мадни четин хьанва. Гьар гьикI ятIани, милли пресса хуьн, виликди тухун важиблу везифа я. Чна кхьин тавурла, ам бес маса халкьарин векилри кхьидани? — алава хъувуна райадминистрациядин кьилин заместитель Алмас Шуаева ва подпискадик къуьн кутун сиясатдин метлебдин чарасуз месэла тирди, декабрдин вацран сифте совещанидал и кардин нетижаярни кьадайди къейдна.
Ахцегьрин тарихдин музейдин директор Агьмед Дагъларова къведай гьафтеда Махачкъалада республикадин “Культсанштурм” проектдай, метлеб Ахцегьрин ичер — бренд артмишун яз, махсус выставка тешкилзавайдакай, райондин культурадин управленидин заведующий Къистер Гъаниевади 29-декабрдиз “Самур” ресторанда ЦIийи йисан чIехи вечер (“Голубой огонёк”) тешкилиз кIанзавайдакай малуматар гана ва абуруз гиламаз гьазурвал акун лазим тирди къейдна.
Дашдемир Шерифалиев
