Йисалай-суз вичин сергьятар гегьеншарзавай ва агьалийрин, гьа жергедай яз аялрин кьадарни гзаф жезвай къадим Дербентда мектебрин ва аялрин бахчайрин кьадар артухарунин чарасузвал ава. ГьикI хьи, шегьерда къенин йикъалди кардик квай 21 мектебди ва 30-дав агакьна аялрин бахчайри агьалийрин игьтияжриз тамамвилелди жаваб гузвач.
Месэладин метлеблувал ва агьалийрин тIалабунар фикирда кьуналди, шегьердин ад-министрацияди мукьвал йисара Дербентда мектебрин ва аялрин бахчайрин кьадар хейлин артухарун кьетIнава. Малум хьайивал, и кар иллаки эхиримжи вахтара арадал атанвай цIийи “Южный”, “Аваин-4”, “Аэропорт”, “Пинхас-къеле” микрорайонриз талукь я.
Планламишнавайвал, цIийи эцигунрив “Аваин-4” микрорайондилай эгечIда. 2020-йисуз гзаф агьалияр яшамиш жезвай ана 804 чкадин юкьван мектеб ва 250 чкадин аялрин бахча эцигиз башламишда.
Шад жедай кар ам я хьи, Дербент шегьер чIехи хьунин рекьяй гьукуматдин махсус программадин бинедаллаз, мукьвал йисара ина цIийи 9 мектеб ва аялрин са шумуд бахча эцигун планламишнава.
Нариман Къарибов
