Дербентда 2023-йисан эхирдалди туризмдин гьуьлуьн порт эцигун планламишнава. Къимет гьеле тайин хьанвач, хабар гана, ТАСС-диз интервью гудайла, шегьердин мэр Хизри Абакарова.
“Дербентда гьуьлуьн порт жеда, ина тахминан чкани тайинарнава — пешекарар атана, килигна, ам гьинал эцигун хъсан ятIа лагьана. Им са акьван еке тушир туризмдин порт жеда. Адан гавань ЦIийи шегьер микрорайонда эцигун планламишнава, майдандин кьадарни 130 гадиз барабар я. 2023-йисан эхирдалди ам эцигна куьтягьун планрик ква”, — лагьана Х.Абакарова.
Адан гафаралди, портунай туристривай гьуьлуьн къерехдиз къвез жеда, гележегда порт Нарын-Къала къеледихъ галаз канатдин рекьи алакъалу ийида. “Чаз тахминан ам фидай рехъ чизва. Канатдин рехъ Пушкинан куьчедай фида, даяхар жедай чкаярни малум я. Ам эцигунив къведай йисуз эгечIун планламишнава ва 2023-йисан эхирдалди куьтягьда”, — алава хъувуна Дербентдин мэрди.
Октябрдиз Дагъустандин экономикадин министрдин везифаяр вахтуналди тамамарзавай Гьажи Султанова ТАСС-диз малумарайвал, республикадин властри Махачкъалада ва Дербентда Каспийдал туризм вилик тухун патал гимияр акъвазардай цлар эцигун планламишнава. Адан гафаралди, гимияр акъваздай цлар хкажунин планар Астраханда сейр ийидай “Петр Великий” гими туькIуьрунихъ ва Каспийдал туризм вилик тухунин мумкинвилерихъ галаз сих алакъада ава.
«Лезги газет»
