Музейрин шегьер тир къадим Дербентда и мукьвара халичаяр хрунин рекьяй этнографиядин музей ачухун гуьзлемишзава. Къейдна кIанда хьи, и кардик кьил кутазвайди Азербайжан республикадин “Азерхалыча” ачух акционеррин обществодин (ОАО) правленидин председатель, халичайрин рекьяй машгьур эксперт, тарихдин илимрин доктор, профессор Видади Мурадов я.
Дербент шегьердин кьил Хизри Абакаровахъ галаз хьайи гуьруьшдин вахтунда, Бакудай атанвай мугьманди къейд авурвал, къадим шегьерда ачухдай этнографиядин музейда гзаф къиметлу ва маракьлу экспонатар — гъилелди хранвай тек-бир амай халичаяр жеда.
Тежрибалу архитектор Фахруддин Мирабасова музейдин проектни туькIуьрнава. Суьгьбетдай мадни малум хьайивал, цIийи кардик кьил кутунвайбуру амукьнавай тек-бир халичайрин чIехи коллекцияни кIватIнава.
Къадим Дербентда гъилин кIвалахдин халичайрин этнографиядин музей ачухун дуьшуьшдин кар туш, гьикI хьи, Дербентда халичаяр хрунал машгъул хьунихъ агъзур йисарин тарих ава. Фадлай авай делилра ва риваятда лугьузвайвал, къенин йикъалди амай виридалайни дегьзаманайрин “Гатфарин халича” VI асирда Дербентда хранва.
Дербентдин кьил Хизри Абакароваз цIийи музей ачухунин фикир ва анин проект гзаф бегенмиш хьана, ам эцигдай чка ва инвестор жагъурун хиве кьуна.
Нариман Къарибов
