20-октябрдиз РД-дин эцигунрин ва ЖКХ-дин министрдин заместитель Ризван Мурадов ва финансринни майишатдин таъминвилин управленидин начальник Руслан Гьасанов Мегьарамдхуьруьн райондиз мугьман хьана.
Райондин кьил Фарид Агьмедовахъ галаз санал РД-дин эцигунрин ва ЖКХ-дин министерстводин векилар 504 аялдиз кIелдай чкаяр жедай школа эцигзавай тегьер ахтармишун патал Самурдиз фена. РикIел хкин, школа эцигун 2008-йисуз гъиле кьунай. Гзаф йисара давам жезвай эцигунрин кIвалахар республикадин инвестицийрин программадин сергьятра аваз акьалтIардайвал, и рекьиз программадай 122 миллионни 260 агъзур манат чара авун фикирда кьунва.
Райондин кьили къейдзавайвал, вилик эцигнавай месэла эцигунрин кIвалахар вахтунда тамамарна куьтягьуникай ибарат ятIани, тамамарзавай кIвалахар ерилудаказ кьиле тухунизни еке фикир гузва.
Пудратдин тешкилат тир “Стройтехнохолдинг” ООО-ди школадин гьаятда мад кьве блок — актовый зални галай тIуьнар гудай чка ва спортзал — эцигзава. Мектебдин дараматдин къене ремонтунин кIвалахар кьиле физва. Делегацияди объектдин гьазурлухвал ахтармишна ва фялейрихъ галаз рахана. ИкI, малум хьайивал, эцигунрин кIвалахар тамамвилелди кьиле физва. Къенин йикъан делилралди, гьазурлухвилин дережа 45 процентдиз барабар я. Мектеб алай йисан эхирдалди ишлемишиз вахкуда.
РД-дин эцигунрин ва ЖКХ-дин министрдин заместителди школа эцигуниз бюджетдай чара ийизвай такьатар вахтунда ва тамамдаказ ишлемишун патал къуватар желбун тIалабна. И карда, ада хиве кьурвал, министерстводи вичивай жедай куьмекни гуда.
Фарид Агьмедова къейд авурвал, объект алай йисуз вахкун патал районди лазим тир вири серенжемар кьабулда.
«Лезги газет»
