Чпин пешедиз вафалу, гьакъисагъ зегьметдалди халкьдин патай гьуьрмет къазанмишнавай духтурар чи хуьрера тIимил авач. Мукьвара “Лезги газетдин” редакциядиз Кьурагь райондин КIирийрин хуьряй атай са чарче гьа ихьтин пешекаррикай тир Сулейман-Стальский райондин центральный больницада (ЦРБ-да) аялар хадай отделенидин духтур  Манфиза  Бабаевна  Дадашевадикай  ва кIвачел залан дишегьлийрихъ гелкъвезвай отделенидин акушерка  Эльвира  Далгатовна  Гьабибуллаевадикай  разивилин гафар кхьенвай ва газетда абурукай макъала чап авун тIа­лабнавай.

“Йифен вахт тир. Садлагьана кIва­чел залан зи рушан руфуна тIал гьатна. Ам авай гьал фикирда кьуна, чна, эн­гел тавуна, руш Сулейман-Стальский райондин больницадиз агакьарна. Адаз килигайдалай кьулухъ Манфиза духтурди рушаз чкадал куьмекдай мумкинвал авачирдакай ва тади гьалда­ Дербентдин больницадиз агакьарна кIанза­вай­дакай лагьана. И легьзеда гьар са декьи­кьа багьа тир. Чахъ галаз Дер­бент­­диз, кIусни инжиклу тахьана, Манфиза Бабаевна ва акушерка Эльвира Далгатовнани рекье гьатна. Ина чун ажугъ, къал кваз кьабулна, “азарлуди куьне иниз вучиз гъан­вайди я?” лугьуз, Манфиза Ба­ба­­ев­на­диз чпин нара­зивилер къалурна. Ам­ма зи рушан гьалдикай хъсандиз хабар авай къайгъудар духту­рди наразивилин рахунриз яб ганач. Ам гьар садав сабурлувилелди рахана ва азарлудаз, ам гьинай, ни гъанвайди ятIа фикир тага­на, медицинадин сифте куьмек гун гьар са азар­ха­надин, гьар са духтурдин везифа тирди абурун рикIел хкана. Эхирни Манфиза Ба­баев­надин ва Эльвира Далгатовнадин куьмекдалди зи руш хирургиядин отделени­диз агакьарна. Адаз тади гьалда операция авуна. Шукур Аллагьдиз, вири саламатдиз алатна.­ Эгер чун и пешекар духтуррал ацалт­начир­тIа, низ чидай кьисмет гьихьтинди жедай­тIа…”, — къейднава чарче адан авторди.

Гьелбетда, халкьдин арада ихьтин гьуьр­мет авай инсанрикай кхьин журналистдизни хуш жедай кар я. Чун райондин больницадиз­ рекье гьатна, анин кьилин духтур Максим Ханбалаевахъ галаз гуьруьшмиш хьана.

— Гьакъикъатдани, Манфиза Бабаевна ва Эльвира Далгатовна чпин пешедал рикI алай, хивевай везифайрив намуслудаказ, жавабдарвилелди эгечIзавай духтурар я, — лагьана ада. Чпин пешедиз ва Гиппократан кьинез вафалувал къалурзавай абурулай чун гзаф рази я.

Гьа икI, чун М.Дадашевадихъ ва Э.Гьа­би­­буллаевадихъ галаз мукьувай таниш хьана.

Манфиза Бабаевнадин ери-бине Вини СтIалдилай я. Юкьван мектеб акьалтIарай­далай кьулухъ ам 2008-йисуз Дагъустандин госмедуниверситетдин педиатриядин факультетдик экечIна.

— За духтурвилин пеше хкягъун дуьшуьшдин кар туш, — лугьузва Манфиза Дадашевади. — Сад лагьайди, гьеле мектебда кIелзавай йисарилай зи рикI и пешедал алай. Кьвед лагьайди, зи диде Закерьяева Серафима Селимовнади больницада хирургиядин отделенида медсестра яз кIвалахиз 30 йисалай виниз я. РикI алай пешедин иеси хьунал ва дидедин кар давамарунал за шадвалзава.

2014-йисуз медуниверситет ва 2017-йисуз акушер-гинекологвилин пешедай ординатура акьалтIарай М.Дадашевади 2017-йисалай инихъ Сулейман-Стальский ЦРБ-да чна винидихъ къейд авурвал, аялар ха­дай отделенида, гьа са вахтунда хизан ара­дал гъунин (планирования семьи) каби­нетда кIвалахзава. И куьруь девирда ада вич хъсан чирвилер авай, пеше­дал рикI алай духтур, масадан дердидикай хабар кьадай, ширин мез авай инсан яз къалурна. Манфиза Бабаевнади дидейринни бицIекрин гьакъиндай къайгъударвал ийизва. Аялар тежезвай инсанар сагъар хъувун, абуруз лазим тир дарманар авун патал вичин вири къуватар желбзава. Зегьметди вичин нетижани гузва. ИкI, М.Дадашевади чаз лагьайвал, эхиримжи вахтара районда хазвай аялрин кьадар хейлин артух хьанва. Аялар тежезвай 15 кас алай йисуз ЭКО авун патал рекье туна, абурукай 5 касдиз аяларни хьанва.

Къейд ийин хьи, М.Дадашевадин багърийрин арада  медицинадин хиле кIвалах­за­вай­бур мадни ава. ИкI, стха Аслана Краснодарда — хирург, адан уьмуьрдин юлдаш Фаидади акушер-гинеколог яз кIвалахзава.

Райондин больницадин кIвачел залан дишегьлийрихъ гелкъведай отделенидин акушерка Эльвира Далгатовнадихъ галаз хьайи суьгьбетдай малум хьайивал. Ада 1994-йисуз Дербентдин медучилищедин “акушерское дело” отделение акьалтIарна. Гьанлай инихъ ам агьалийрин сагъламвилин къаравулда акъвазнава.

КIвачел залан дишегьлийрихъ гел­къуьн­, абурун, гьакIни бицIекрин къайгъударвал авун регьят кар туш. Пешедал рикI хьу­ни ва 25 йисан тежрибади Э.Гьабибуллаевадиз ви­чин хиве авай жавабдар кIвалах уьзягъдаказ кьиле тухудай мумкинвал гузва­.

— Диде хьун, бицIекдиз уьмуьр гун — ибур шадвал кутадай крар я, — лугьузва Эль­вира Гьабибуллаевади. — Жувавай и кардик пай кутаз хьунал зани шадвалзава…

Э.Далгатовнадин хва Агьадулагьани медицинадин хел хкянава ам сарарин духтур я.

Чаз якъин хьайивал, Манфиза Дадашевадиз ва Эльвира Гьабибуллаевадиз чпин пешедин духтурдин кIвалахди шадвал, руьгьдин таъминвал гузва. Абуруз гьахълудаказ лацу халат леке алачиз хуьз­вайбур лугьуз жеда.

Хазран Кьасумов