Квез чидани?
ЧIулав ва рагъул рангар какахьай сар алай и гьайван Мадагаскарда яшамиш жезва. Адаз ай-ай ва я Мадагаскардин руконожка лугьузва. Нек хъвадайбурук акатзавай и гъвечIи вагьшиди вичин уьмуьр чими тамара кьиле тухузва.
Илимдин ахтармишунар тухуналди, 1780-йисуз сифте яз и гьайван раижайди Пьер Соннера я. Сифтедай ам чакъвалай ийидай (грызун) гьайванрин жергедик кутунвай. Гуьгъуьнлай яргъалди давам хьайи гьуьжетрин нетижада алимри и гьайван кьетIен жуьредин лемуррин (маймун хьтин гьайван) жинсиникай тирди малумарна.
Яргъи къармахар алай гъвечIи вагьшидин заланвал тахминан 3 килограмм кьван жеда. Хъуьтуьл туьк алай тумунин яргъивал 60 сантиметрдив агакьда. Адан сарар кьиферинбуруз ухшар я. И гьайванрин уьмуьр ахтармишай Э.Стерлинган фикирдалди, бязи вахтара, жуьт-жуьт хьана, абур чпиз ем жагъурунин гьерекатрик жеда. ТIебиатда руконожка гьикьван вахтунда яшамиш жедатIа тайинарнавач. Зоопаркда абур 26 йисуз кьван яшамиш жезва.
Алай вахтунда ай-ай Яру ктабда гьатнава. Дуьньядин тIебиат хуьнин къаравулда акъвазнавай союзди и гьайванар хуьнин месэла къарагъарна.
«Лезги газет»
