Дербентдин электросетар чи республикадин энергетикадин хиле лап фадлай авай карханайрикай сад я. Вич тешкилайдалай инихъ алатнавай 60 йисалайни гзаф девирда и кархана гегьеншаруник, вилик тухуник кар алакьдай бажарагълу пешекарар, тешкилатчияр яз хьайи Борис Кукса, Буйбут Бейбутова, Юнус Балабегова лайихлу пай кутуна.
Алай вахтунда коллективдиз вичи са шумуд йисуз Къизлярда авай Теречный электросетрин директорвиле кIвалахай тежрибалу пешекар Иса Рагьимова регьбервал гузва. Адан ва карханадин кьилин инженер, Дагъустандин энергетикадин хилен ветеранрикай сад тир Алик Халидович Агъаханован алакьунарни себеб яз, карханадин коллективди шегьер датIана электроэнергиядалди таъминарзава.
Къейдна кIанда хьи, кIвенкIвечи карханада гьамиша хьиз, зулун ва 2019-2020-йисарин хъуьтIуьн варцара агьалияр ва тешкилатар электроэнергиядалди атIунар авачиз таъминарун патал вири гьазурвилер акунва. Алатай йисан хъуьтIуьз арадал атай бязи татугай (коллективдилай аслу тушиз) дуьшуьшарни фикирда кьуна, гьазурнавай махсус пландал асаслу яз, карханадин балансдал алай саки 370 километрдин мензилда электрикдин линияр (ЛЭП), 240 трансформатордин тадаракар ва подстанцияр гатфарин ва гатун вахтунда ахтармишнава, 20 километрдин мензилда ЛЭП-ар капитальнидаказ ремонтнава, герек чкайра симер дегишарнава, гар акъатдай вахтара шегьердин куьчейрин къерехра авай электрикдин симерихъ галукьдай тарарин хилер атIанва.
Кархана алукьзавай хъуьтIуьз гьазуруник тежрибалу энергетикар тир распредсетрин начальник, “Дагэнергодин” лап хъсан мастер лагьай тIварцIиз лайихлу хьанвай Ж.Мирземетован, кабельный линийрин мастер Н.Гьасанован, электромонтерар тир А.Абдурагьманован, Б.Салманован, А.Исаеван, Б.Акперован гьакъисагъ зегьметдин лайихлу пай ква.
— Чна фикирзавайвал, — лугьузва Алик Агъаханова, — гьар йисуз хьиз, цIини “Дагъустандин сетевой компаниядин” махсус комиссияди чи коллективдин кIвалахдиз, 2019-2020-йисарин хъуьтIуьз гьазурвилер акуниз лайихлу къимет гуда ва чав гьазурлухвилин паспорт вахкуда.
Къейд ийин: бязи татугайвилерни авачиз туш. Ингье и барадай карханадин распредсетрин начальник Жамирзе Мирземетова вуч лугьузватIа:
— Дербент шегьердин мулкунал чи карханадин балансдал алачир гзаф кьадар электрикдин линияр, 200-дав агакьна трансформаторрин тадаракар ала. Абуруз шегьерда иесисузбур лугьузва. Дуьз лагьайтIа, абурухъ иесияр ава — агьалияр чеб. ГьикI хьи, хсуси кIвалер авай микрорайонра, шегьердин виликан гьакимрин къайгъусузвал себеб яз, цIийиз арадал атанвай яшайишдин кIвалерин куьчейра авай электрикдин шалманар, трансформаторар, симер, агьалийри чпин пулунихъ къачунвайбур я. Чеб ишлемишдай вахт куьтягь хьана, чилевай пай ктIанвай кIарасдин даяхар бязи куьчейра патахъ хьанва ва абуру электрикдин барадай хаталувални арадал гъизва. ИкI ятIани, — давамарзава ада, — чна гьа линияр ва трансформаторарни чи гуьзчивилик кутунва, къуллугъзава, агьалияр эквер авачиз туниз рехъ гузвач.
Электросетрин вилик-кьилик квайбурун ихтилатрай малум хьайивал, винидихъ къалурнавай тIал алай месэла гьялун, татугайвал арадай акъудун патал Дербент шегьердин адинистрацияди иесисуз линияр, трансформаторар, лазим тир къайдадиз гъана, электросетрин ихтиярдиз вахкудай шартIар яратмишна кIанзава. Аквар гьаларай, чи республика электрикламишунин, яни и барадай вири тадаракар дегишарна, цIийи хъувунин федеральный программадал вил алаз акъвазнавай хьтинди я. Яраб, лугьуда за, а программа къадим Дербентдив мус агакьдатIа?
Нариман Къарибов
