Экология — чун элкъуьрна кьунвай тIебиат михьиз хуьн, яшайишдин амукьаяр, зирзибил тIимиларун неинки шегьерра, гьакI хуьрерани важиблу, гьелелиг тамамвилелди гьял тавуна амай месэла я. Хъсанвилихъ дегишвилер тунин, михьивилер хуьнин барадай эхиримжи вахтара Дербент шегьерда хейлин серенжемар кьабулнава ва и кар давамарзава.
Шегьердин вири куьчейра, гзаф мертебайрин кIвалерин гьаятра, агьалийрин истемишунар, меслятар фикирда кьуналди, зирзибил кIватIдай махсус чкаяр тадаракламишнава, контейнерралди таъминарнава. Яшайишдин амукьаяр яргъалди аламукьуниз рехъ гузвач.
Алай йисуз къадим шегьерда анин мулкар михьидаказ хуьнин карда мад са важиблу цIийивал арадал атанва — агьалийри фадлай гуьзлемишзавай зирзибилар, яшайишдин амукьаяр гьялдай махсус “АРВ — пласт” завод эцигна, кардик кутунва.
Карханадин генеральный директор Вадим Герееван гафаралди, цIийи заводди шегьердин агьалийривай 6 жуьредин пластмасдин ва полиэтилендин амукьаяр кьабулзава. Абурукай чкадал зирзибилар кIватIдай пакетар гьазурзава. Продукциядин са пай — гранулар — пластикдин турбаяр акъуддай карханайризни рекье твазва.
— Чи заводдилай вацра 350 тонн пластикдин ва полиэтилендин амукьаяр гьялиз алакьзава. ГьакI тирвиляй чун Дагъустандин маса шегьеррай ва районрайни винидихъ къалурнавай жуьрейрин амукьаяр кьабулуниз гьазур я. Амукьайрихъ тайин гьакъини гузва.
«Лезги газет»
