Дагъустанда цIуд йисалай гзаф вахтунда ишлемишай, мектебар патал тайинарнавай автобусар йисан эхирралди цIийибуралди эвезда. И мурадар патал 186 миллион манатдилай виниз такьатар чара авунва, хабар гузва республикадин Минобразованидин сайтди.
“ЦIинин йисуз мектебрин куьгьне хьанвай улакьар цIийибуралди эвез авун патал, 95 автобус къачудайвал, республикадин бюджетдай 186 миллион манатдилай виниз пул чара авунва. Гьа икI, цIуд йисалай гзаф вахтунда ишлемишнавай автобусар цIийибуралди эвез авунин кIвалах Дагъустанда акьалтIарнавайди яз гьисабиз жеда”, — лугьузва малуматда.
Пресс-къуллугъдин делилралди, 2019-йисуз, игьтияж аваз, улакьдикай магьрум тир мектебар патал 70 автобус маса къачуда. Абур пайдайла, мектебар аялар яшамиш жезвай чкайривай къакъатнаваз хьунин дережадиз кьилин фикир гуда”, — алава яз баян хгана пресс-къуллугъди.
2018-йисуз республикадин 140 мектебда федеральный бюджетдай ахъайнавай такьатрин гьисабдай куьгьне автобусар цIийибуралди эвезна. Алай вахтунда Дагъустандин умуми образованидин идарайра 610 улакь ишлемишзава.
«Лезги газет»
