Хачмаз райондин Лежет хуьре заз танишар, ярар-дустар гзаф ава. И гатуз зун ана Меликалиев Жабраилахъ галаз таниш хьана.
Жабраил 1965-йисан 2-февралдиз совхоздин кьилин агроном Абубекиран хизанда дидедиз хьана. Меликалиеврин хизанда 8 велед ава: 6 рушни 2 гада.
Диде-бубади хъсан тербия гана чIехи авунвай абур вири динж я.
Жабраила мектеб, ахпа Бакуда гьуьлерин гимийрин рекьяй техникум куьтягьна, электриквилин пеше хкяна. Ада Астраханда гимийрин идарада электриквиле кIвалахиз эгечIна. Адан жавабдарвилик квай гимияр Каспий гьуьлуьн Къерехда авай къецепатан вири уьлквейриз пар тухузвайбур тир. Амма Жабраилан бубадиз хцин пеше бегенмиш хьанач. Гьар сеферда адан патав фейила, бубади хциз, гьуьлерин кIвалах туна, вичин патав хъша лугьуз тагькимардай. Хцихъ хизан хьайила, бубадиз ам хайи ерийривай яргъара амукьуникай кичIезвай. Эхирни бубадин тIалабун Жабраила кьилиз акъудна — Каспийдин церин бушлухар кьулухъ туна, ам кIвализ хтана.
Са кьадар вахт алатайла, Жабраил кеферпата авай Ноябрск шегьердиз ана яшамиш жезвай вахан патав фена. Ина ам газдин турбайрихъ галаз алакъалу чIехи карханада электриквиле кIвалахал акъвазна. Ана ада хизанни кутуна.
Жабраил цуьквер хьтин пуд рушан буба я. Абур вири динж хьанва. Жабраил бубадихъ галаз хуьруьз хтана, адан хтулрини ял язава. Адаз ина вичин кIвал-югъ, багърияр, ярар- дустар ава.
Са шумуд йис вилик Жабраила Ноябрскда вичин хсуси идара ачухна, ана зегьмет чIугвазва. Кеферпатан шегьерда адаз ярар-дустар пара хьанва. Аниз кIвалахиз къвезвай лезги гадайризни ада вичелай алакьдай куьмекар гузва.
Четин береда инсандин гъил кьун адан бубадин тарс я. Жабраилаз неинки бубадин тарсар, гьакIни играми бубайрин ери тир Миграгърин хуьр, анин тарих, инсанрин кьисметар иллаки хуш я.
Жабраилан диде- буба Хачмаз райондиз гьеле фад куьч хьанай, амма хайи хуьруькай кIвач атIаначир. Жабраилни, кеферпатай хтайла, аниз физва, хайи дагъларин къужахда адан руьгь тух жезва. Ахьтин вахтар ам патал виридалайни багьабур, адаз ана дагъларин шимедин бицIи хъипрепIни багьа я.
Алай вахтунда Жабраил вичин чIехи буба суьргуьн авур чка жагъуриз алахънава. Ругуд аял кIвале туна, халкьдин душман я лагьана, чIехи буба гьикI тухванайтIа, адаз чизва. И кар ада бубадин тIал рикIе амаз рагьметдиз фейи вичин буба Абубекиран тIварцIиз ийизвай гьуьрмет хьиз кьабулзава. Лезги руьгь квай Жабраил хьтин рухвайрал зани дамахзава. Жабраил Абубекирович абурлу хесетрин, руьгьдиз михьи инсан яз акуна заз. Гьина аватIани, сагъ-саламат хьурай чи намуслу ватандашар!
Бике Алибегова
