СтIал Сулейманан районди эхиримжи вахтара аваданвилихъ йигиндиз камар къачузва. Алай йисан майдин вацра чIехи шаир СтIал Сулейманан 150 йисан шад мярекат кьиле тухвана, октябрдиз райондин 90 йисан юбилей къейд авуниз гьазурвилер аквазва. Ихьтин ва маса кIвалахрик райондин агъсакъалрин, дяведин ва зегьметдин фронтдин иштиракчияр хьайи итимринни дишегьлийрин еке пайни ква.
Ахьтинбурукай яз, чавай Герейханован 1-хуьряй тир бахтлу хизандин кьил Эмирбегов Эмирбеган тIварни кьаз жеда. Ам 1932-йисан июндиз Кьурагь райондин Ашахуьре лежбер Азизан хизанда дидедиз хьана. Азизахъ мад кьве стха авай, абурни лежбер итимар тир. Кар алакьдай, мал-къара хуьдай, зегьметдал рикI алай Азизахъ 5 хва авай. Эмирбег виридалайни чIехиди тир. Аялар гъвечIизмаз, Азиз рагьметдиз фена, кIвалин чIехивал Эмирбегал аватна. Хайи хуьре 4-класс куьтягьай Эмирбегаз кIелун давамардай мумкинвал хьанач. Гьар жуьредин алакьунар авай жегьил 1951-йисуз Советрин Армиядин жергейриз тухвана.
Колхоздин председателди армияда хъсандиз къуллугъна хтанвай Эмирбег Махачкъаладиз тракториствилин курсариз ракъурдайвал хьана. Амма адаз и пеше хуш хьаначир, ам элкъвена хуьруьз хтана. Армиядай хтай жегьилар а чIавуз хуьряй патарал ахъайзавачир, хуьрера пешекарар, шоферар, трактористар герек къвезвай. Патарал фин патал абуруз справка, я тахьайтIа паспорт герек къвезвай.
А вядеда Герейханован совхоз чIехи майишат, гьар жуьредин кIвалахар авай бегьерлу чка тир. 1955-йисуз Эмирбег Азизович и совхоздиз акъатна. И вахтунда ана гьарнай кIватI жезвай агьалийри цIийи кIвалер эцигзавай. Сифтедай ада эцигунардай, ремонтардай идарада кIвалахиз хьана. Совхоздиз рагьметлу Тарикъули Османова регьбервал гузвай. Гуьгъуьнлай, 1955-йисуз директордин къуллугъдал Гьабибов Абдуллагь хтана. И совхозда — консервиярдай заводда, багълара, мехпаркда ва маса хилера — йигиндиз гьар жуьредин кIвалахар физвай вахт тир. Гуьгъуьнлай совхоздин директор Бачханов хьайила, Эмирбег Эмирбегова эцигзавай маларин фермайрин цIийи комплексдал цлан ва харат устIарвилин кIвалахар авуна. Эмирбега ийизвай кIвалахар акурла, адаз са яр-дустуни “Ви гъилер къизилдинбур я, дуст” лагьанай ва тахта гьялдай станок багъишнай. Гьанлай кьулухъ ада совхозда цIийи кIвалер эцигиз, рак-дакIар кутаз хьана. Совхоздин эцигунардай участокдиз пилорама хкайла, ада рагьметлу Нежведилов Пашадихъ галаз санал кIвалахна.
Совхоздин руководстводи Эмирбег гьина гуьгъуьна амукьай кIвалах аватIа, гьаниз рекье твадай. Са кьадар яшариз акъатайла, ада диндиз къуллугъ ийиз башламишна, Аллагь-Тааладин рекьел элкъвена. Акьалтзавай жегьил несил тербияламишун патал дуьз рекьер къалурдай, ацукьай-къарагъай чкадал абурухъ галаз суьгьбетар ийидай. А йисара хуьрера, шегьерра мискIинар эцигиз хьана. Герейханован хуьре ам авачир.
Гуьгъуьнлай, диндин рекьел элячIзавайбур, мусурманвал хуьзвайбур артух хьайила, Эмирбегани Пашади хуьре мискIин эцигун пландик кутуна. Эцигдай чкани чирна, жемятдивай пулар кIватIиз башламишна. Къванер ва маса материалар хкун патал ЛукIварин транспортдин идарадай улакьар къачуна. Алай вахтунда хуьруьн юкьвал гуьрчег мискIин арадал атанва. Жегьилри ана купIар ийизва, михьивал хуьзва, мевлидар кьиле тухузва, суварриз садакьаяр гъизва. И адалатлу кIвалахрик Эмирбег Эмирбегова ва Нежведилов Пашади чпин еке пай кутуна.
1955-йисуз армиядай хтай жегьил гада ашахуьруьнви Алидин руш Суварал эвленмиш хьанай.
Сувара Эмирбегаз камаллу 7 аял — 4 рушни 3 гада багъишна. Абуру тербияламишай веледар чпин дережадихъ агакьна, вирида кьилин ва юкьван чирвилер къачуна. Алай вахтунда хизанарни галаз гьарна яшамиш жезва. Диде-бубадин насигьатриз вафалу веледар абурувай яргъа акъвазнавач, мукьвал-мукьвал хквез, кьил чIугвазва, гуьгьуьлар ачухарзава.
Эмирбег бубади ва Сувар дидеди чеб бахтлу ксар яз гьисабзава. Гьа са вахтунда, алай девирдикай рахадайла, ада са тIимил гьайифни чIугвазва.
— Дегишвилер, мублагьвилер гзаф хьанва, амма виликан Советрин Союздин вахтунда хьтин гьуьрмет, хатур, адалат, чIехи-гъвечIиди чир хьун амач. Гьиниз фейитIани, пул це лугьузва. Больницаяр, кIелдай, кIвалахдай чкаяр хсусибур хьанва. Бейкар жегьилар, куьчебасан хьана, чIуру рекьера гьатзава. Герейханован совхоз гьихьтин тIвар-ван авай, девлетлуди тир. Гьукумат чукIуникди вилик-кьилик квай ксари вири маса гана, тарашна. Гьайиф хьи, А.Гьабибован, М.Бачханован, И.Исмаилован зегьметар вири вара-зара авуна, — лугьузва агъсакъалди.
Э.Эмирбеговни адан уьмуьрдин юлдаш Сувар зегьметдин ветеранар, Эмирбег Герейханован 1-хуьре авай яшлу агьалийрикай я. КIвалахдин вахтунда адаз совхоздин руководстводи фикир тагана тунач. Зегьметдин зарбачи грамотайрин, пишкешрин сагьиб я.
Хъсан хизандин кьил, тербиячи тир Эмирбег халудин яшар хьанватIани, хуьре кьиле физвай вири мярекатра, жемятдин кIвалахра ада рикI алаз иштиракзава. Гьуьрметлу Эмирбег халу, чна куьн хьтин диде-бубайрал дамахзава. Квехъ чандин сагъвал хьун чи мурад я.
Вадим Жамалдинов
