2020-йисуз  шегьердин  властри  Дер­бентда 5 куьче цIийикIа туьхкIуьр хъувун пландик­ кутунва. Алай вахтунда проектринни сме­та­дин документар гьазурзава. Идакай Дер­бентдин мэр Хизри Абакарова Instagram  сетда авай вичин чина хабар гузва.

“Исятда гьеле 2019-йисан зул я, амма чна къведай йисуз гьи куьчеяр цIийикIа туьхкIуьр хъийидатIа, гьазурвилер аквазва. КIвалахар йисан сифте кьилелай башламишун патал чна гьеле гиламаз проектринни сметадин документар гьазурзава ва абур государстводин экспертизадиз рекье твазва. Заз квез хабар гуз кIанзава: алатай гьафтеда и месэлаяр гуьзчивилик квай  министерствойри Дербентдин 5 куьчедин проектриз талукь кIвалах тайинарна ва къулар чIугунва”,  — кхьенва ана.

Шегьердин кьили мадни хабар ганвайвал, къведай йисуз цIийикIа туьхкIуьр хъийидай граф Воронцован, Карл Марксан, Тахо-Годидин, Красный Зарядин, Шеболдаеван, Генрих Гьасанован, Кобякован, Нанейшвилидин тIварарихъ галай куьчейра ремонтдин кIвала­хар кьиле тухудай проектрин организация тайинарун патал мукьвал йикъара  конкурс малумарда.

“Чи гьисабралди, и куьчейриз талукь яз гьазурнавай проектар чав 2020-йисан эвел кьилера агакьда. Ахпа кIва­­лахар кьиле тухун патал тендер малумарда. Финансрин такьатар “Дербент шегьер” округдин мулкар санлай (комплекснидаказ) вилик тухун” госпрограмма уьмуьр­­диз кечирмишунин сергьятра аваз чара ийида”, — кхьенва ана мадни.

Винидихъ тIварар кьунвай куьчеяр цIийи­кIа туькIуьр хъувуник асфальт дегишарун, бордюрар эцигна, тротуарар туь­кIуьрун, коммуникацияр цIийибуралди эвезун ва эквер тун акатзава.

«Лезги газет»