Гьар цIийи кIелунин йисаз гьазурвилер аквадайла, гзаф аялар ва тIимил эменни авай хизанриз куьмек гунин макьсаддалди, Сулейман-Стальский районда «Аял мектебдиз рекье тур» тIвар алай серенжем кьиле тухузва. И хабар «Лезги газетдив» муниципалитетдин администрациядин пресс-къуллугъди агакьарна.

ЦIинин йисуз серенжемда райондин яшайишдин рекьяй куьмекар гузвай управлениди, и рекьяй халкьдиз къуллугъ авунин комплексдин центради, гьакIни мергьяматлувилин «Инсан» фондуни иштиракна.

Серенжем кьиле тухудайла, кIвале мектебдиз фидай яшдин аялар авай, дарвиле авай хизанар ва абур мектебдиз гьазур хьанвай гьал  ахтармишна.  Мергьяматлувилин серенжем тухунин нетижада райондин мектебра кIелзавай 42 аял мектебда герек жедай чарасуз тадаракралди (портфелар, дафтарар, къелемар ва мсб.) таъминарна.

Идалайни гъейри, РД-дин Гьукуматдин къарардал асаслу яз, сад лагьай классдиз камар къачузвай аялар авай 26 хизандив са сеферда яз гузвай 2 агъзур манат пул агакьда.

«Лезги газет»