Агъа СтIалар. ХХ асирдин Гомер СтIал Сулейманан хайиди тир хуьруьн юкьван школадин гьаят 2-сентябрдин юкъуз муаллимрив, гъилера цуькверни шарар авай, школьный формаяр алай кIелзавайбурув, абурун диде-бубайрив ацIанвай. Чирвилерин йикъаз ва кIелунин цIийи йис башламишуниз талукьарнавай шадвилин линейка школадин отличникри Россиядин Федерациядин ва Дагъустан Республикадин пайдахар хкажунилай ва Россиядин Гимн тамамарунилай башламишна.
Гьуьрметлу мугьманар яз и мярекатда СУлейман-Стальский райондин кьил Нариман Абдулмуталибова, Дагъустан Республикадин здравоохраненидин министрдин 1-заместитель Фейзулагь Гьабибулаева, райондин Общественный палатадин председатель Алимет Мейланова иштиракна.
Мярекатдал сифте гаф райондин кьил Нариман Абдулмуталибов рахана, ада муаллимриз, ученикриз цIийи кIелунин йис райондин депутатрин Собранидин, администрациядин ва кьилди вичин патай мубаракна, муаллимрихъ кIвалахда, школьникрихъ кIелунра агалкьунар хьана кIанзавайди лагьана.
— ЦIинин кIелунин йисуз райондин школайра партайрихъ 6450 кас ацукьда, абурукай 724 аял школадиз сифте яз къвезвайбур я. Агъа СтIалрин юкьван школадизни 42 аял сифте яз атанва. Къейд ийиз кIанзава хьи, школадиз сифте яз къвезвай бицIекрин кьадар йисалай-суз артух жезва, ида рикIерик шадвал кутазва, — лагьана Н.Абдулмуталибова.
Дагъустан Республикадин руководстводин тIварунихъай шадвилин мярекатдин иштиракчийриз Чирвилерин югъ ва цIийи кIелунин йис башламиш хьун РД-дин здравоохраненидин министрдин 1-заместитель Фейзулагь Гьабибулаева мубаракна.
Шадвилин линейкадал гьакIни райондин образованидин управленидин начальник Гьуьсейн Шихбабаев, школадин цIийиз хкянавай директор Феликс Магьмудов, Агъа СтIалрин хуьруьн поселенидин администрациядин кьил Низами Абдурагьманов, педагогвилин зегьметдин ветеран Музанфар Шихнабиев ва маса юлдашар рахана.
11-классда кIелзавайбуру 1-классдиз атанвай аялриз хъсандиз кIелуниз, муаллимриз яб гуниз, школадин хъсан ва баркаллу адетриз вафалу хьуниз эвер гана.
1-классдиз атанвай аялри школадикай, муаллимрикай, чирвилерикай шиирар кIелна, манияр лагьана. Сифтегьан зенг ягъунин ихтибар 1-классдиз атанвай вахар-кьветхверар тир Эмиля ва Карина Муртузалиевриз ва педагогвилин зегьметдин ветеран Музанфар Шихнабиеваз авуна.
Школьникри цавуз лифер ва жуьреба-жуьре рангарин шарар ахъайна, классра партайрихъ чкаяр кьуна.
Нариман Абдулмуталибов ва Фейзулагь Гьабибулаев Алидхуьрел 150 касдиз чкаяр аваз цIийиз эцигзавай школадин дараматдални фена.
Хазран Кьасумов
