Чи кIелзавайбуруз малум кар я, 2016-йисуз республикада ва Дагъустандилай къеце авай жуьреба-жуьре кеспийрин иесийри, азад вахт яратмишунин кIвалахдиз серфзавай ватанэгьлийри, “Булах” кIватIал арадал гъанай. Гьар гатуз адан иштиракчияр санал кIватI жезва, авур крарикай сада-садаз хабар гузва, чпин цIийи эсеррихъ галаз танишарзава, рикIерик секинсузвал кутазвай месэлаяр веревирдзава.
2017-йисуз “Булахдин” илгьамдаррин (15 кас) шииратдин ва гьикаятдин “Булахдин чешмедал” тIвар алаз вижевай ктаб акъатнай. Гуьгъуьнин йисара “Булахдин” къаюмвилик кваз Гуьлжагьан Мисрихановадин, Гюзеля Гьасановадин ктабарни акъатна. Ингье цIи мадни са агалкьун — “Илгьамдин булахар” тIвар алаз, яратмишунардайбурун кIватIалдин 25 векилдин шиирар ва гьикаяяр авай ктаб майдандиз акъуднава. Авторрин чIехи пай жегьил гадаярни рушар я.
Ктабдин “Рехъ физвайда атIуда…” сифте гафуна Дагъустандин писателрин Союздин лезги секциядин регьбер Владик Батманова кхьизва: “Илгьамдин булахри” кIелзавайбур 25 автордихъ галаз танишарзава. Абурукай 18 жегьил шаирар я. Им шад жедай вакъиа я. Дидед чIал хуьнин рекье женгина авай, медениятдиз, эдебиятдиз къуллугъ авунал рикI алай руьгьдин стхайринни вахарин кIватIал Гюзеля Гьасановадивай гьазуриз хьанва. Умудзава, ктабда эсерар гьатнавай авторри чпин рехъ намуслудаказ ва пешекарвилелди давамарда…”
Лугьун хьи, уртах ктабда гьатнавай жаванар ва жегьилар умуд кутаз жедайбур я. Идахъни чун ктаб кIелайла ва 23-августдиз Кьасумхуьрел райондин культурадин дараматда кьиле фейи “Булахдин” илгьамдаррин межлисдал милли шииратдиз викIегьдиз, бажарагълувилелди камар къачунвай цIийи ксарихъ галаз таниш хьайила агъуна. Тубуя Мегьамедбегова, Терана Керимова, Марьям Гьасанова, Айсанат Качаева, Тамила Салманова, Ирада Герейханова, Мадина Рамазанова, Зарема Девришева, Элмар Саруханов, Юрмет Нагъиев, Омар Къазиханов, Гьамзат Усманов… Мадни лагьайтIа, печатдин милли изданийриз мукьвал-мукьвал чпин эсерар акъатзавай Фазир Жаферов, Ноябрь Бейбутов, Марьям Алискерова, Жульета Омарова, Гулфия Пашаева, Луиза Агьмедова… Эхь, абурухъ шаирвилин бажарагъ ава. И кар кIелзавайдаз таъсирдай, руьгьда гьахьдай манадин гуьрчег цIараралди, шиирралди успатзава.
Илгьамдаррин межлис “Булах” кIватIалдин регьбер Гюзеля Гьасановади кьиле тухвана. Ктабдин авторри чпин шиирар кIелна.
Межлисдин иштиракчияр тир Гуьлжагьан Мисрихановади, Сажидин Саидгьасанова, Нариман Ибрагьимова, Къадимбег Ильясова, Нажмудин Шихнабиева, Сейфудин Шагьпазова, Къагьриман Ибрагьимова, Низам Гьасанова, Мизамудин Магьмудова ктаб акъудунал зегьмет чIугур Гюзеля Гьасановадиз ва авторриз — тебрикдин, жегьилриз меслятдин гафар лагьана.
Абад Азадов
