Малум тирвал, алай йисан 8- сентябрь чи уьлкведа сечкийрин сад тир югъ хьиз кьиле фида. Россиядин регионрин сечкичийри азад хьайи чкайрал РФ-дин Госдумадиз са шумуд депутат, 19 субъектдин кьилер ва хейлин регионрин гьукумдин законодательный органриз депутатар хкяда. 8-сентябрдиз Астрахандин, Сахалиндин, Кургандин, Оренбургдин, Мурманскдин, Липецскдин, Курскдин, Волгограддин, Вологдадин областрин, Забайкальедин, Ставрополдин крайрин, Башкирия, Алтай, Калмыкия, Кабардино-Балкария, Крым республикайрин ва Санкт-Петербургдин сечкичийри чпин регионрин кьилер хкяда.
Алатай йисарин тежрибади къалурзавайвал, бязи чкайра сечкийрилай виликан женгер еке митингриз, наразивилеризни элкъвезва. Зиянлу, тахсиркарвилин гьерекатриз рехъ гайи дуьшуьшарни хьана. Гилани акурвал, Москва шегьердин думадиз депутатвиле регистрация тавур кандидатрин агъзурралди терефдарар куьчейриз экъечIна. Абуру сиясатдин метлеб авай истемишунарни ийизвай, уьлкведин президентдин, гьукумдин хиве жуьреба-жуьре тахсирарни твазвай. Бязи туьнтбуру къуватдалди гьукум дегишаруниз хас эвер гунарни ийизвай.
Гьелбетда, гьукумди ва къайдаяр хуьдай органри законрин сергьятра аваз герек серенжемар кьабулна. Митингчиярни секин хьана. Гила вири 8-сентябрдиз сес гуз фин лазим я.
Сечкийрин сад тир юкъуз Дагъустандани талукь мярекатар кьиле фида. РД-дин избиркомдай хабар гайивал, республикада сечкийриз гьазур хьунин кIвалах къалмакъал галачиз кьиле фена. Районрин, шегьеррин собранийриз депутатарвиле кандидатар ругуд партияди къалурнава: “Сад тир Россияди”, ЛДПР-ди, “Гьахълу Россияди”, КПРФ-ди, “Кардин партияди” ва “Россиядин Федерациядин казакрин партияди”. Санлай къачурла, кьве вишелай виниз кандидатар регистрация авунва. ЧIехи пайни сечкичийрин объединенийри къалурнавайбур я.
8-сентябрдиз Леваша райондин Чуни ва Бежтинский участокдин Тлядал хуьрерин администрацийрин кьилер, цIуд районда собранийрин депутатар хкяда.
Избиркомдин член Зарипат Салахбеговади лагьайвал, сечкийрин 19 участокни лазим къайдада гьазур хьанва. Гьеле июндиз сечкияр кьиле фидай участокрин избиркомрин председателрихъ галаз совещание тухвана ва абур чпин вилик акъвазнавай везифайрин гъавурда туна. Избиркомдин членар тир Багьадин Гусаева, Самир Абдулхаликьова сечкичийрин сиягьар къайдадаваз хьунин чарасузвиликай лагьана, сечкийрин кампанийриз пулдин такьатар чара авунин, сечкийрилай виликан таблигъат тухунин, автоматламишнавай “Сечкияр” система ва цIийи жуьредин технологияр ишлемишунин месэлаяр ачухарна.
Хийир Эмиров
