26-августдиз Сулейман-Стальский райондин администрацияда райондин кьил Нариман Абдулмуталибова заместителрихъ, жавабдар къуллугъчийрихъ, хуьрерин кьилерихъ, мектебрин директоррихъ, образованидин хиле кIвалахзавайбурухъ ва масабурухъ галаз райондин образованидин идараяр цIийи кIелунин йисаз гьазур хьанвай гьалар веревирдун патал совещание кьиле тухвана. Идакай «Лезги газетдиз» райадминистрациядин пресс-къуллугъди хабар гузва.

Мектебар гьазур хьанвай гьаларикай образованидин управленидин начальникдин везифаяр тамамарзавай Г.Шихбабаева ихтилатна. Ада хабар гайивал, алай вахтунда вири мектебра ремонтрин кIвалахар эхирдал къвезва. Вири крар, графикдин бинедаллаз, вахтунда кьилиз акъудзава. Ам «Точка роста» центраяр, лицензия авай медкабинетар, чими санузелар арадал гъунихъ галаз алакъалу месэлайрал, «150 мектеб» проектдин сергьятра аваз кьиле фейи кIвалахрал акъвазна. Малум хьайивал, «Точка роста» центраяр райондин 6 мектебда арадал гъанва. Докладчиди алай йисуз и хилерай давамардай, кьилди къачуртIа, чими санузелар туькIуьр хъийидайдакайни ихтилатна. Образованидин идарайра авунвай ва хъийидай крарин патахъай алава малуматар райондин кьилин 1 лагьай заместитель Л.Оружевани раижна.

Эхирдай Н.Абдулмуталибова образованидин идарайрин кьиле акъвазнавайбурун дикъет, цIаяр кьунин хатасузвилин истемишунар вилив хуьналди, мектебар талукь тирвал гьазурунин месэлайрал желбна.

«Лезги газет»