Ахцегь район Дагъустан Республикада къадим ва машгьурбурукай сад я. Гъилевай 2019-йисан 5-октябрдиз, райадминистрациядин къарардалди, адан 90 йисан юбилей къейдзава. И лишанлу вакъиа лайихлувилелди тухун патал тешкиллувилин комитетди сувариз гьазурвал акунин кIвалахар кьиле тухузва.

“Ахцегь район” муниципалитетдин кьил, суварин тешкиллувилин комитетдин председатель Осман Абдулкеримован регьбервилик кваз райадминистрациядин залда оргкомитетдин сифте заседание хьана. Адан кIвалахда райондин руко­водстводи, СП-рин кьилери, идарайринни кар­ханайрин руководителри ва общественный тешкилатрин векилри иштиракна.

Сифте гаф рахуналди, мярекат райондин кьилин заместитель Алмас Шуаева ачухна, ахпа ам суварин тешкиллувилин комитет­дин председатель Осман Абдулкеримова да­ва­марна. Сувар лап вини де­ре­жа­дин тешкиллувал аваз кьиле тухун патал абу­ру чпин фи­кирар лагьана, кIватI хьанвайбурун теклифрихъ яб акална ва абуруз талукь тир тапшуругъар гана.

Къейд ийин, райондин 90 йисан юбилейдин шадвилер ва гьадахъ галаз санал Ах­цегь­­рин­ ичерин суварни 5-октябрдиз Ахцегьа, Валентин Эмирован тIварунихъ галай ял ядай багъ­да­­ кьиле тухуда. Тестикьарнавай махсус­ план­-графикдин бинедаллаз, райондин сергьятдал алай аркадилай ва обелискдилай­ эгечI­на рай­центрадин кьилин куьчеяр, майданар, паркар къайдадиз хкана хьиз, абур суварин пайдахралди, лозунгралдини транспарантралди безетмишдайвал я. В.Эми­рован багъда райондин хуьрерин кьилди-кьилди майданар патал чкаяр тайинарнава. Анра гьар са хуьруь (абурузни чпин оргкомитетар ава) вичин тарихдиз, культурадиз, адетриз, кухнядиз, машгьур ксариз талукь материаларни шейэр къалурда. Му­зейрин, яратмишу­нин кIвалин, искусстводин ва юннатрин школайрин коллективри райондин тарихдин ва культурадин месэлайриз талукь выставкаяр ачухда. Суварин юкъуз рай­онэгьлийризни мугьманриз рикI аладардай, ял ядай ва пулсуздаказ ширинлухрихъ га­лаз чай хъва­дай­, гьакI ужуз къиметрай шишкабабарни милли кухнядин няметар дадмишдай мумкинвал жеда.

Алай вахтунда теклифдин рангунин чарар­, суварин лишанар (баннерар, значокар, эмбле­маяр, календарар), мугьманриз пишкешар гьа­зурунин къайгъуйрик ква. Суварин шадвилера республикадин машгьур “Лезгинка” ансамблдин ва лезгийрин госмуздрамтеатрдин коллективрини иштиракдайвал я. Районэгьлийризни мугьманриз гьакI спортдин акъажунриз, йикъан­ ва йифен гала-концертриз тамашдай мумкинвал жеда. Иллаки кье­тIен ва багьа­ савкьат районэгьлиярни мугь­манар патал Ах­цегь райондин тарихдинни культурадин мана­дин рангунин­ чIехи ва гуьр­чег ктаб жеда. Метлеблу и вакъиадиз та­лукь яз гьа юкъуз райондин “ЦIийи дуьнья” газетдин махсус нумрани акъатда.

Дашдемир Шерифалиев