И йикъара «Кьурагь район» МР-дин администрациядин заседанийрин залда кIвалахдин рекьяй гьар гьафтедин нубатдин совещание кьиле фена. Идакай «Лезги газетдиз» райадминистрациядин пресс-къуллугъди хабар гана.

Райондин идарайринни тешкилатрин кьиле акъвазнавайбурун иштираквал аваз райондин кьилин заместитель М.Хариева тухвай совещанидал алатай гьафтедин кIвалахрин ва гъилевай гьафтеда кьилиз акъудна кIани месэлайрин патахъай гегьенш веревирдер хьана.

Хуьруьн майишатдин ва чилерихъ галаз алакъалу отделдин начальникдин везифаяр вахтуналди тамамарзавай А.Фаталиева къейд авурвал, райондин сергьятра техилар вири кIватI хъувуна куьтягьнава. Алай вахтунда салан майваяр кIватI хъувунин ва хъуьтIуьн алафар гьазурунин кIвалахар кьиле физва. Дуьзенлухда авай хуьруьн майишатра ципицIар кIватI хъувунизни гьазурвал аквазва.

ЦРБ-дин кьилин духтур А.Азимова инфекциядин азаррин вилик пад кьун патал тухузвай кIвалахдикай, бюджетдин такьатар 700 агъзур манатдин тIимил хьанвайдакай ва идахъ галаз алакъалу яз штатдин расписанидиз цIийи кьилелай килиг хъувунин чарасузвал авайдакай малумарна.

Совещанидал чпин жавабдарвилик квай кIвалахрин гьакъиндай ЖКХ-дин къуллугъчияр тир Ш.Мусаева, М.Османова, кьилин духтурдин заместитель М.Сефералиева, финансрин отделдин къуллугъчи П.Къурбановади ва масабуру ихтилатна.

Совещанидин нетижаяр кьурдалай кьулухъ М.Хариева жавабдар къуллугъчийриз гьафтедин муддатда тамамарна кIани тапшуругъар гана.

«Лезги газет»