Мегьарамдхуьруьн райондин руководитель Фарид Агьмедова жавабдар ксарихъ галаз санал 9-августдиз региондин “150 школа” проектдин сергьятра аваз ремонтдин кIвалахар кьиле физвай ва чкадин метлеб авай рекьер ремонтунин программа уьмуьрдиз кечирмишзавай гьалар ахтармишна. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
Мегьарамдхуьруьн районда “150 школа” программадин сергьятра аваз 2019-йисуз умуми образованидин пуд идара — Хъартас-Къазмайрин, Муьгъверганрин ва Гъепцегьрин — ремонтзава.
РикIел хкин, “150 школа” проект Дагъустандин Кьил Владимир Васильеван теклифдалди уьмуьрдиз кечирмишзавайди я. Умуми образованидин тешкилатра ремонтдин кIвалахар проектдал асаслу яз, республикадин бюджетдин такьатрин гьисабдай, спонсоррин куьмекдалди ва муниципальный ресурсрин гьисабдай финансламишзава.
Райондин кьил Фарид Агьмедов, адан сад лагьай заместитель Гьабибуллагь Мурадалиевахъ, Хъартас-Къазмайрин хуьруьн кьил Омар Нагъиевахъ ва школадин директордихъ галаз хуьруьн школадиз фена, умуми образованидин идарада ремонтдин кIвалахар кьиле физвай гьал ахтармишна.
“Школайра ремонтрин кIвалахар кIелунин цIийи йис башламишдалди куьтягьун лазим я. Графикдилай ва рекьерин картайрилай къецихъ экъечIуниз рехъ гудач. Республикадин руководстводи чи вилик чна вахтунда тамамарун лазим тир месэлаяр эцигнава. Чаз месэлаяр уьмуьрдиз кечирмишдай, абур гьялдай хъсан мумкинвилер ганва. ГьакI хьайила чна бушвал тавун лазим я”, — къейдна Фарид Агьмедова. Гьа са вахтунда ада школайрин медицинадин кабинетар тадаракламишнавай гьалдиз ва школаяр чими санузелралди таъминарунизни фикир гун лазим тирди лагьана.
Фарид Агьмедова рабочийрихъ галаз суьгьбетарна, ремонтдин кIвалахар кьиле физвай гьалдиз итиж авуна, школадин гьаятриз килигна, анаг къулайдиз туькIуьрун важиблу тирдан гьакъиндай лагьана.
“Чахъ гьар садахъ школадин гьаят кул-кусралди безетмишдай мумкинвал ава, и кар гзаф важиблу я ва умуми образованидин идарайрин руководителри и кардиз кьетIен фикир гун лазим я, и кар патал са акьван еке пулар лазим къвезвач, кIанзавайди рикIе къаст хьун я, лагьана райондин кьили.
Идалай гуьгъуьниз райондин кьили чкадин метлеб авай рекьер ремонтзавай гьал ахтармишна. Хъартас-Къазмайрал хуьруьн къенепатан рекьера къир цазва. 8 куьче цIийикIа туькIуьр хъийида ва “Чкадин инициативаяр — 2019” проектдин сергьятра аваз 5 куьчеда къир цада.
Фарид Агьмедов и хуьре авай вахтунда агьалийрихъ галаз гуьруьшмиш хьана. Районда муниципалитетдин, республикадин ва федеральный проектрикай, программайрикай ва абур уьмуьрдиз кечирмишзавай месэлайрикай суьгьбетна. И кардиз талукь яз чкадин агьалийрин фикирар гьихьтинбур ятIа чирна.
“Сифте яз Дагъустанда региондин Кьил Владимир Васильеван теклифдалди чна гуз хьайи транспортдин налог субсидия яз чав вахканва. И карни ада чавай чкадин метлеб авай рекьер ремонт ийиз ва абур къулай гьалдиз гъун патал авунвайди я”, — лагьана чкадин агьалийриз райондин кьили. Райондин руководителдихъ галаз хьайи суьгьбетда хуьруьн агьалийри инсанрин уьмуьрдин ери хъсанарунин чалишмишвилер авунай Дагъустандин руководстводиз сагърай лагьана.
Кьиле тухвай ахтармишунрин нетижайрай Фарид Агьмедова жавабдар ксариз талукь тир тапшуругъар гана.
«Лезги газет»
