Алай йисан 1-июлдин делилралди, Дагъустан Республикада вири жуьре налограй хьанвай умуми бурж 24,6 миллиард манатдив агакьнава.
Ихьтин делилар Россиядин федеральный налогрин къуллугъдин Дагъустан Республикада авай управлениди агакьарзава. И кьадардикай эменнидилай къачузвай налогдай кIватI хьанвай буржуни 5,2 миллиард манат тешкилзава. Мисал яз, дагъустанвияр транспортдилай гузвай налогдай 3,6 миллиард манат, чилерилай къачузвайдай — 1,1 миллиард ва кьилдин ксарин эменнидилай кIватIзавай налогдай тахминан зур миллиард манат буржлу хьанва. Хабар гузвайвал, буржлу хьанвай налогрин пул кIватIун патал УФНС-ди суддин органрин куьмек ишлемишзава, рейдар кьиле тухузва ва икI мад.
“Чна инсанар гзаф кIватI жезвай чкайра гъавурда твадай мярекатар кьиле тухузва, вацра кьве сеферда налогар кIватIдай йикъар малумарзава. Алай вахтунда республикада “Отпускдиз — буржар алачиз” серенжем кьиле тухузва. Адан сергьятра аваз агьалияр налогар тагана хьайитIа гьихьтин нетижайрал къведатIа, гьадан, кьилди къачуртIа, буржунин пулунин винел пеня кIватI жезвайдан гъавурда твазва”, — малумарзава Управленида авай чешмеди.
«Лезги газет»
