Эмиров  Тажидин  Эмирович  Кьасумхуьруьн (Сулейман-Стальский) райондин Ивигрин хуьре  1929-йисан 22-августдиз дидедиз хьана.

Ватандин ЧIехи дяве башламиш хьайила, адан яшар 12 йисав агакьнавай, гьаниз килигна, дяведин йисарин зулумар ада вичин чандалди гьиссна.

Тамам яшар хьанвачиртIани, ада, колхозда кIвалахиз, неинки хизандиз, гьакIни фронтдиз куьмек гуз хьанай. Мектебда кIелун вахтуналди туниз мажбур хьана, гьаниз килигна 8-класс ада  вичин 18 йис тамам хьайила акьалтIарна. 1948-йисуз ам Бакудиз фена ва 26 комиссардин тIва­рунихъ галай НПУ-дин 5-мяденда кIвалахал акъвазна. Тажидин Эми­рович  нефтяникрин несилдай я.  Бакудин патав гвай Локк-Батанда  адан буба — мяденар эгъуьндай устIар Эмир-Рашид гзафбурун рикIел алама. Бубадилай хцел  неинки  нефтяникдин муракаб пеше, гьакIни ийизвай кардив рикI гваз эгечIун, гьамиша вичин устадвал хкажиз алахъун хьтин ерияр  агакьна.

1958-йисуз Тажидин партиядин жергейриз гьахьна. И вахтунда ада нафт хкуддай оператор яз кIвалах­завай. Идахъ галаз сад хьиз, ада  Бакудин нафтIадин техникумдани кIелзавай. 1960-йисуз Тажидин Эмировича нафтIадинни газдин мяденар ишлемишдай техниквилин диплом къачуна.  1964-йисуз  адакай нафт хкуддай мастер, ахпа сме­надин начальник хьана.

Тажидин Эмировича идара ийизвай  нафт хкуддай бригададилай  гьамиша разивал ийизвайди тир, адаз коммунистический зегьметдин коллектив лагьай тIвар ганвай ва хейлин йисара адакай соцсоревнованидин гъалибчи жезвай. Йисалай-суз бригадади нафтIадин мяденрин управленида сифтегьанди яз  планда къалурнавай тапшуругъар кьилиз акъуднавайдакай хабар гузвай.

1970-йисуз Бакудин 26 комиссардин тIварунихъ галай НПУ-дин нефтяникри  миллиарддикай эхиримжи тоннар нафт хкуддай ихтияр къазанмишун патал соревнование кьиле тухун теклифнай ва Бакудин амай мяденра кIвалахза­вай­буруз и акъажунра иштиракуниз эвер ганай.  Соревнованидин  нетижайрай ихьтин ихтияр Тажидин Эми­рован регьбервилик квай сад лагьай мядендин 5-бригадади къазанмишна. Тек са йисан вахтунда ада ганвай тапшуругъда къалурнавай кьадардал алава яз 3000 тонн нафт хкудна.

Тажидин Эмирован бригададикай гьам республикадин, гьамни центральный газетра са шумудра кхьенай. Ада газетрин чинрилай  кIва­лахдин цIийи къайдайрикай суьгьбетар авур, вичин тежриба паяй дуьшуьшарни тIимил тушир.

Общественный уьмуьрдани ада активвилелди иштиракзавай. Ам мядендин профсоюздин комитетдин  членвиле,  партиядин тешкилатдин секретардин заместителвиле, Баку шегьердин халкьдин депутатрин райсоветдин депутатвиле хкянай.

Вичин уьмуьрдин 45 йис  Тажидин Эмировича  нафтIадин мяденриз бахшна. Государстводини ада и хиле чIугур зегьметдиз лайихлу къимет гана. Намуслу зегьметдай ва производствода хьайи агалкьунрай  адаз Гьукуматдин гзаф кьадар шабагьар, гьа жергедай яз  “Азербайжандин нафтIадин миллиард лагьай тонндай” “Ватандин ЧIехи дяведа Гъалибвилин 60 йис”, “Вад ва ирид лагьай пятилеткадин зарбачи”, “Зегьметдин ветеран” медалар, гзаф кьадар гьуьрметдин грамотаяр ганва. Гьар йисуз, Гъалибвилин сувариз адаз уьлкведин Президент В.Путинан ва Гьукуматдин Кьил Д.Медведеван тIварцIе­лай теб­рикдин  чарар, савкьатар хквез­ва­.

ЧIехи несилдин ксари Советрин Союз чукIун заландиз кьабулна, гьикI лагьайтIа абуру хайи Ватандикай  зурба ва гужлу уьлкве авун патал гзаф къуватар ва зегьметар серфна эхир. Гзаф вахтара абур хайи ерияр туна, яргъал йисара кIваливай, гьатта республикадивай яргъа кIва­ла­хуниз мажбур жезвай. Анжах са фикирди — гьина аваз хьайитIани, абуру чIуг­вазвай зегьмет зурба уьлкведин гележег паталди тирдахъ инанмишвили абуруз багърийривай яргъа яшамиш жедай къуватар гузвай. ЯтIа­ни, хайи чили вичихъди чIуг­­вазвай ва, гзаф йисар алатайлани, абур элкъве­на ватандиз хквезвай. Гьа икI, Тажидин Эмировични 1996-йисуз Да­гъус­тандиз хтана ва ада Дер­бент­да кIвал-югъ кутуна.

Тажидин Эмирович  къастунал кIеви, вилик эцигнавай макьсаддихъ ялдай, гъиле кьур кIвалах гьамиша кьилиз акъуддай къилихрин кас я. Алатнавай йисарикай рахадайла ада вич бахтлу кас тирди къейдзава.  Эвелни-эвел адаз бахтлувилин гьиссер вичин пуд веледди ва  гзаф кьадар хтулри багъишзава. Адан чIехи руш Фатимади  къе­цепатан чIаларин институт акьал­тIарнава ва  алай вахтунда Азербайжандин Гьукуматдин кIва­ле кIвалахзава. Кьабулнавай руш Периханума ДГУ акьалтIарна­ва ва  Дербент шегьердин 2-нумрадин аялрин кIвале зегьмет чIугвазва. Хва Ме­гьамеда лагьайтIа, хизандин пеше давамарун кьетIнава. Москвадин энергетический институт акьалтIар­на­вай ам  алай вахтунда “Росатом” корпорациядин къурулушдик квай проектный институтдин кьилин пешекар я.

22-августдиз Тажидин Эмировичан 90 йис тамам жезва. Яшар са кьадарбур хьанватIани, ам, виликдай хьиз, кIубан ва зирек я, ада вичин багърийриз, танишриз краралдини, меслятралдини куьмек гуз чалишмишвалда.

Вири  багърийри ва мукьва-кьилийри  гьуьрметлу  Тажидин Эмиро­вичаз  юбилей тебрикзава ва  адахъ яргъал уьмуьр, мягькем сагъламвал, рикIин секинвал ва хизанда анжах шадвал хьунин келимаяр лугьузва.

Жасмина Саидова