Фадлай инихъ кардик квай Дербентдин медколледж неинки са чи республикада, гьакI Кеферпатан Кавказдани лап хъсанбурукай сад я. Ина чирвилер ва тербия къачур агъзурралди пешекарри шегьердин, республикадин ва гьакI уьлкведин маса регионрин медидарайра гьакъисагъвилелди зегьмет чIугвазва, чпи чирвилер къачур идарадин, анин муаллимрин тIвар вине кьазва. Идан гьакъиндай медколледждиз ганвай дипломри, гьуьрметдин грамотайри ва аниз гьар йисуз гзаф чкайрай къвезвай чухсагъулдин чарари, телеграммайрини шагьидвалзава…
И мукьвара медколледждин коллективдин уьмуьрда лишанлу вакъиа хьана — алай йисуз медколледж акьалтIарнавайбурув медицинадин юкьван дережадин пешекарвилин дипломар шад гьалара вахкана. ЦIи медколледж вири санлай 374 жегьилди, гьа жергедай яз 233 медсестради, 74 фельдшерди ва 67 кас акушеркайри акьалтIарна. Абурукай 21 касди яру дипломар къазанмишна.
Жегьил пешекаррив дипломар вахкуниз талукьарнавай шад мярекатдал медколледждин директор, Дагъустандин общественный палатадин член С.Гьамзатовади, шегьердин администрациядин культурадин, спортдин, жегьилрин политикадин ва туризмдин рекьяй управленидин начальник Н.Балогълановади ва шегьердин общественностдин са жерге векилри медколледж агалкьунралди акьалтIарун жегьил пешекарриз рикIин сидкьидай мубаракна, чи ватандашрин сагъламвал хуьнин карда агалкьунар хьун алхишна.
Нариман Къарибов
