Урусатдин жуьреба-жуьре пипIерай чав машгьур лезгийрикай хабарар агакьзава. Кьисметди чеб акъуднавай чкайрани абуру лайихлу уьмуьр кьиле тухузва; кIвалахдани, илимдани агалкьунар къазанмишзава, миллетдин тIвар вини дережадиз акъудзава.
Пензадин госуниверситетда кIвалахзавай экономикадин илимрин кандидат Лейла Айваровна Гьамидуллаевани (Агьмедова) алакьунар авай жегьил алим я. Ам 1985-йисан 13-июндиз Каспийск шегьерда дидедиз хьана. Каспийскдин 2-нумрадин мектебда кIелай вахтунда ада республикадин ва вирироссиядин олимпиадайра са шумуд сеферда гъалибвилер къачуна. 2002-йисуз къизилдин медалдалди мектеб куьтягьайдалай кьулухъ ам “Бухгалтерский учет, налогообложение и аудит” пешедай ДГУ-дик экечIна. 2005-йисуз цIийи хизан арадал атуникди кьисметди Лейла Гьамидуллаева Пензадиз акъудна. КIелунар ада Пензадин университетда давамарна ва ам 2007-йисуз яру дипломдалди куьтягьна. 2009-йисуз ада агалкьунралди аспирантура акьалтIарна ва кандидатвилин диссертация хвена.
Жегьил алимди Пензадин госуниверситетда къецепатан студентриз ингилис чIалал экономикадин тарсар гузва. И вузда тарсар гунилай гъейри, Лейла Гьамидуллаевади Москвадин госуниверситетдин Пензада авай филиалдин информатикадин кафедрадин заведующийдин къуллугъни кьилиз акъудзава.
Илимдин хиле Лейла Айваровнадихъ гзаф агалкьунар ава. Къецепатан уьлквейрин машгьур журналра адан къелемдикай хкатнавай илимдин макъалаяр чапдай акъатнава. Вичин редакциядик кваз международный монографиярни чапдай акъудзава.
Ам Россиядин экономикадин азад обществодин региондин отделенидин, США-дин “IJKM” журналдин редакциядин коллегиядин член, “IJARB” журналдин кьилин редактордин заместитель я.
Адан буба Айвар Агьмедов полициядин подполковник я, алай вахтунда тешкиллу тахсиркарвилерихъ галаз женг чIугунин рекьяй РД-дин МВД-дин управленида чIехи оперуполномоченный яз кIвалахзава; дидеди — Марият Агьмедовади — Каспийск шегьердин 2-нумрадин мектебда урус чIаланни литературадин тарсар гузва. Лейладихъ са стхани са вах ава. Адан вичин хизанда рушни чIехи хва жезва.
Алакьунар авай жегьил алим илимдин рекье къазанмишнавай агалкьунрални къачунвай чирвилерал рази хьана акъвазнавач. Алай вахтунда ам Санкт-Петербургдин госуниверситетда экономикадин илимрин докторвилин диссертация хуьн патал гьазур жезва. Чазни ам мадни еке дережайрив агакьна кIанзава.
Куругъли Ферзалиев
