И йикъара Сулейман-Стальский райондин кьил Нариман Абдулмуталибова райадминистрациядин жавабдар къуллугъчийрихъ галаз санал Алкьвадрин хуьре «Агъа СтIал» дигидай цин къаналдихъ галаз алакъалу яз арадал атанвай месэла чкадал фена ахтармишна. Идакай «Лезги газетдиз» райондин администрациядин пресс-къуллугъди хабар гузва.

Эхиримжи йикъара арадал атай селдин нетижада къаналдин сив тухвана, ам тамамвилелди къайдадикай хкатна. ЧIур хьайи участокдин мензил 120 метрдикай ибарат я. Дигидай цин къанал республикадин балансдал алатIани, райондин администрация лазим тир серенжемар кьабулуниз мажбур хьанва, гьикI хьи, дигидай сезондин вахтунда Курхуьруьн, Кьулан СтIалрин, Вини СтIалрин ва Агъа СтIалрин майишатар цикай магьрум жезва.

Райондин кьили пешекарриз ва хуьруьн администрациядин кьилиз тади гьалда талукь тир серенжемар кьабулунин ва РД-дин Минмелиоводхоздин руководстводиз арадал атанвай гьалдин патахъай хабар гунин тапшуругъ гана.

Н.Абдулмуталибов кьиле авай дестеди гуьгъуьнлай Кьулан СтIалрин «ЦIегъверхвал» къанал авай гьални ахтармишна. И къаналди Кьулан СтIалринни Агъа СтIалрин майишатар дигидай целди таъминарзава,  адаз эхиримжи 8 йисуз ремонт акунвач. Къаналдин 300 метрдин участок чIуру гьалдиз атанва. Райондин кьили и къаналдихъ галаз алакъалу яз арадал атанвай месэла гьялунин карни талукь ксарал тапшурмишна.

«Лезги газет»