“Лезги газетдиз” РД-дин здравоохраненидин министерстводин пресс-къуллугъди хабар гайивал, “Здравоохранение” милли проектдин сергьятра аваз Дагъустандин аялрин ирид поликлиникада аялар гваз къвезвай диде-бубаяр ва духтурар патал алава къулай шартIар арадал гъидайвал я.

Министр Жамалудин Гьажиибрагьимован гафарай малум хьайивал, ихтилат республикадин меркездин 1, 4, 5-нумрайрин ва Н.М.Кураеван тIварунихъ галай ДРКБ-дин патав гвай, Каспийск, Дербент, Буйнакск шегьеррин поликлиникайрикай физва. Медицинадин и идарайра гьам аялар гвай дидеяр, гьамни духтурар патал къулай шартIар туькIуьрунин жигьетдай проектдинни сметадин документация гьазур хьанва. Месэла алай йисан эхирдалди гьялна куьтягьдайвал я. И макьсадриз такьатар федеральный бюджетдай чара ийида.

Ж.Гьажиибрагьимова лагьайвал, сифте нубатда винидихъ къейднавай поликлиникайра ремонтдин кIвалахар кьиле тухуда, азарлуяр регистрация ийидай цIийи къайдаяр кардик кутада. Регистратурадал ацалтзавай кIва­лахдин пар кьезиларунин нетижада духтурдин патав фин патал (прием) герек къвезвай документар гьазурдай вахт кьенятдай мумкинвал жеда. Регистрация неинки са регистратурада, гьакIни интернетдин ва инфоматрин куьмекдалди ийиз жеда. Электронный къайдадин нубат кардик акатуни духтурдин патав физвайбур патал къулайвал тешкилда.

Идалай гъейри, духтурар кхьинрин кIва­лахрикай азад авун патал документарни электронный къайдадиз элкъуьрда. Азарлуяр патални медицинадин электронный картаяр арадал гъида.

Чи мухбир