Мукьвара зун ДГТУ-дин тербиядин кIвалахдин ва яшайишдин рекьяй вилик тухунин отделдин начальниквиле агалкьунралди кIвалахзавай чи ватанэгьли Эседулагь Агъаметович Салагьовахъ галаз таниш хьана. Малум хьайивал, ам чи уьлкведин вузра кардик квай и жуьредин отделдиз регьбервал гузвай виридалайни жегьил начальник, тешкилатчивилин хъсан ерияр хас жегьил я.
Эседулагь 1996-йисан 3-апрелдиз Къизилюрт шегьерда игъирви муаллимдин хизанда дидедиз хьана. Сифтедай Къизилюртдин мектебда чирвилер къачуна, чIехи классриз акъатайла, кIелун Махачкъала шегьердин 9-нумрадин лицейда давамар хъувуна. 2013-2017-йисара ада Дагъустандин гьукуматдин технический университетдин вычислительный техникадин ва энергетикадин компьютеррин технологийрин факультетда, 2017-2019-йисара магистратурада кIелна.
Жегьилди зегьметдин рехъ 2015-йисуз ДГТУ-да лаборант-ахтармишунардайди яз кIвалахунилай башламишна. И пешеда са вацра вичин алакьунар, кардив эгечIунин тегьер къалурун бес хьана — адаз тербиядин ва яшайишдин рекьяй вилик тухунин отделдин пешекарвилин къуллугъ теклифна. Са йисни фенач, Эседулагьа 2017-йисан 1-сентябрдилай отделдин начальниквиле кIвалахзава.
Ругуд къуллугъчиди зегьмет чIугвазвай отделди са жерге важиблу серенжемар — тербиядин, спортдин, медениятдин, донорвилин, терроризмдиз, наркоманиядиз аксивалунин ва масабур — тешкилзава, кьиле тухузва. Студентар патал кьиле тухузвай мярекатрилай гъейри, волонтервилин крарни кьилиз акъудзава. Игьтияж авай ксариз куьмекар гузва, набут аялриз майваяр, емишар ва маса савкьатар гузва. ДГТУ-да кIелзавай диде-буба кьилел аламачир студентриз стипендия тайинарзава. Идалайни гъейри, диде-бубадикай магьрум хьанвай студентриз гьукуматдин патай къвезвай 14 агъзур манатдин кьадарда пулдин такьатар тайинарзава. Диде-бубадикай сад амачир студентризни, вуздин мумкинвилериз килигна, тIимил-шимил куьмекар гузва. Отделдин кIвалахдилай алава яз, вуздин студентрин клубдин крарал гуьзчивал тухузвайбурукай садни Эседулагь я. Адан асул кIвалах документрихъ, серенжемар, мярекатар тешкилунихъ галаз алакъалу я. Азад вахтунда отделди эменни тIимил авай ксарал кьил чIугвазва.
Чешнелу жегьилдихъ гьеле мектебдин ученик ва вуздин студент тир чIавалай анжах виликди финин, илимдал машгъул хьунин къастар авай. Адан буба Агъамет Салагьовни ДГТУ-дин кьилин математикадин кафедрадин муаллим я.
Э. Салагьовахъ студент йисара къазанмишай агалкьунриз килигна ганвай хейлин грамотаяр, чухсагъулдин чарар ава. Адан алакьунар Дагъустандин профсоюздин Гьуьрметдин грамотадалдини къейдна. 2018-йисуз адакай Вирироссиядин “Йисан студент” милли премиядин (Гран-при) гъалибчи хьана. Къейд ийин, и жуьредин агалкьун дагъустанвийрикай анжах 2015-йисуз са студентдихъ хьана.
Пятигорскда гьар йисуз кьиле физвай Кеферпатан Кавказдин жегьилрин “Машук” форумда 2019-йисуз Эседулагь Салагьован “Девир” проект гъалиб хьана ва адаз 150 агъзур манатдин кьадарда аваз пулдин премия гана. Проект кьилиз акъудунин сергьятра аваз ада студентрин арада футболдай, волейболдай, баскетболдай, столдин теннисдай, сирнавунай ва маса хилерай спортдин мярекатар тешкилна.
ДГТУ-да кардик квай бажарагълу аялрин “Альтаир” республикадин центрада гьар тIатIилрин вахтунда мектебрин 7-11-классра кIелзавай аялриз талукь яз, Москвадай муаллимриз, пешекарриз теклифуналди, мярекатар кьиле тухузва. Алатай гатуз кьиле фейи и жуьредин серенжемдин кьиле Эседулагьни акъвазна. Адан гуьзчивилик кваз тешкилай гуьруьшда бажарагъ авай хейлин школьникри иштиракна.
“КьетIен алакьунар, зигьин авай аялар патал ихьтин серенжемрихъ еке метлеб ава, гьикI хьи, республикадин вири пипIерай атанвай бажарагълу аялриз, санал кIватI хьана, чирвилер мадни хкаждай мумкинвал жезва”, — лугьузва Эседулагь Салагьова.
Гележегда Эседулагь Агъаметовичахъ илимдин кукIушрихъди хкаж жедай къаст, ашкъи ава. 2019-йисуз ам вичи кIвалахзавай ДГТУ-дин аспирантурадик (эцигунрин хиляй) экечIна. Алай вахтунда ада “Структура образования и свойства бетонов для футеровки шахтных печей” темадай диссертациядин винел кIвалахзава.
Жегьил начальникдин зегьмет, алахъунар Дагъустандин донорвилин центради ва хейлин маса тешкилатри са жерге чухсагъулдин чарар гуналди къейдна.
Алай вахтунда ада кхьей илимдин 11 макъала международный кIватIалра чапнава. Жавабдар къуллугъдал хьайидалай кьулухъ ада илимдин жуьреба-жуьре конференцийра мукьвал-мукьвал иштиракзава.
КIусни дамах гвачир, шегьерда чIехи хьанвайди ятIани, лап хъсандиз хайи чIалал рахазвай, намуслувилелди жавабдар везифаяр кьилиз акъудзавай Эседулагь Агъаметович хьтин ватанэгьлийри чи миллетдин тIвар виниз хкажзава. Адан зурба агалкьунар гьеле вилик кума. Къуй чи бажарагълу, чешнелу жегьилдин вири мурадар кьилиз акъатрай!
Куругъли Ферзалиев
