РФ-дин журналистрин ва лезги писателрин союзрин член, “Куьредин хабарар” газетдин экономикадин отделдин редактор, “Лезги газетдин”, Кьасумхуьруьн телевиденидин штатдик квачир мухбир Хазран Кьасумова вичин нубатдин ктабдиз “Журналистдин блокнотдай” лагьана тIвар ганва.
Зун адан яратмишунрихъ галаз фадлай ва хъсандиз таниш я, “Журналистдин блокнотдай” ктабдиз за редакторвални авуна. “Шуьше ваъ, гъил хана”, “Девирдин пенсионерар”, “КIуьдай ваъ, цIудай!”, “Берлин къачурди”, “Зи аялдин буба” — юморескаяр, “Къекъуьндикай поворот хьайила”, “Пехилдини туькьуьлди”, “Фикиррик квайбур” — рекьерин къейдер ва маса эсерар фикир желбдайбур хьанва. КьетIен хатI авай журналистди къелемдин куьмекдалди вичин фикирар кIелзавайдал агакьарзава.
Зун кIевелай инанмиш я хьи, “Терезарни герек къведа” (2011-йис), “Ша, хъуьрен, дустар” (2012-йис), “Зи гьевес, зи айгьам” (2013-йис) ва “Йифен зенг” (2015-йис) ктабар хьиз, Х.Кьасумован и ктабни кIелдайбуру хушвилелди кьабулда.
Гьажи Чандаров
