Къадим Дербент югъ-къандавай чIехи ва генани авадан хьуник неинки и шегьердин гьукумди, гьакI чеб адалай къеце яшамиш жезвай дербентвийри, иллаки карчивилел машгъул тир ксарини лайихлу пай кутазва. Ихьтин мергьяматлу ва жумарт рикI авайбурукай садни алай вахтунда Москвада яшамиш жезвай ва ана карчивилел машгъул тир Ферзи Гьамидович Мамедов я.
Кар анал ала хьи, Дербент шегьердин мулкарал адахъ вичихъ и барадай лазим тир вири документарни авай 50 гектар чил аваз са шумуд йис тир. Гьелбетда, бес кьадар такьатар ва мумкинвилер авай карчидивай а чилел коммерциядин дараматар эцигиз ва я хсуси базар кардик кутаз жедай. Амма Ферзи Мамедова вичин рикIин буйругъдалди вири шегьердиз хийирлу къарар кьабулна. Вичин хсусият тир 50 гектар чил пулсуздаказ хайи шегьердин ихтиярдиз вахканва.
Ингье, и барадай шегьердин администрациядин кьил Хизри Абакаровахъ галаз хьайи гуьруьшда Ферзи Гьамидовича вуч лагьанатIа:
— Чи баркаллу ватанэгьли, сенатор Сулейман Керимован чалишмишвилерни гьисаба кьуналди, алай вахтунда Дербент чIехи ва авадан хьуни рикIерик шадвал кутазва. Жувни и кардиз шерик хьун кьетIна за. Гьа са вахтунда за чпихъ чIехи мумкинвилер авай вири дербентвийризни карчийризни хайи шегьер генани чIехи, авадан ва гуьрчег хьуник пай кутуниз эвер гузва.
Нариман Къарибов
