И мукьвара Хуьруьгрин хуьре авай “Люминари” тIвар алай просвещенидин Центрада Россиядин халкьдин артистка Рагьимат Гьажиевадин тIварунихъ галай жегьил пианистрин конкурс кьиле фена. Серенжем тешкилайбур Ахцегь райондин муниципалитет ва Р.Гьажиевадин тIварунихъ галай аялрин музшкола тир. Ана Ахцегь, Луткун, Усугъчай, Рутул, Геджух, Мамедкъала хуьрерин, гьакIни Дербент ва Дагъустандин Огни шегьеррин жегьил музыкантри иштиракна.

Мугьманар тебрик авуналди, аялрин Р.Гьажиевадин тIварунихъ галай музыкадин школадин директор Абдулкерим Рагьимова мя­рекат ачухна. Иштиракчийрихъ эл­къвена тебрикдин гафар “Ахцегь район” МР-дин кьилин заместитель Вадим Агъа­сиева, “Просвещение” фондунин президент, РД-дин ла­йихлу муаллим Магьмуд Абдулкеримова, Россиядин искусствойрин ла­йихлу деятель, РД-дин халкьдин артист Хан Баширова, РУО-дин начальник Алмас Гьа­жиева ва маса ксари лагьа­на. Мярекатдин сергьятра аваз “Ахцегь район” МР-дин кьил О.М.Абдулкеримован тап­шуругъдалди Хан Баширов “Ахцегь райондин гьуьрметлу агьа­ли” лагьай лишандиз лайихлу авуна.

Конкурс вини дережада аваз кьиле фена. Жюриди адан ви­ри иштиракчийрин алакьунриз ку­тугай къимет гана. Конкурсдин не­ти­жай­рай ви­низ тир агалкьунар Ахцегь райондай тир, чпихъ музыкадин рекьяй хъсан гележег авай бажарагълу жегьилри — Мегьамед  Агьмедова,  Муслим  Шерифалиева,  Лейла  Сулеймановади,  Къизил  Шуаевади  ва  Саида  Мегьа­медова­ди  къалурна. Конкурсдин вири иштиракчияр пишкешриз, гьакIни дипломриз ва грамотайриз лайихлу хьана.

Дашдемир Шерифалиев