Алатай гьафтедин эхирра Махачкъалада лезгийрин машгьур шаир Жамидинан 85 йисан юбилейдиз талукьарнавай эдебиятдин межлис кьиле фена. Шииратдин театрда тешкилнавай и мярекатдиз алимар, шаирарни гьикаятчияр, манидарарни муаллимар, студентарни школьникар, Жамидинан эсеррал рикI алай гзаф ксар атанвай.
РикIел хкин, Жамидин Гьажимурадов халкьдин арада шаиррин макан яз гьисабзавай Миграгърин хуьре 1934-йисуз дидедиз хьана. Эдебиятдин алемда ада сифте камар 1950-йисара къачуна. 1958-1994-йисара шаирдин къелемдикай лезги чIалал кхьенвай сатирадинни зарафатрин (юмордин) эсеррикай ибарат гзаф ктабар хкатна. Вичин яратмишунра Жамидина, сатирадин жанрдин кьетIен такьатрикай менфят къачуна, гьакъикъатдин гьерекатар ачухарзава: абурукай бязибур ада векъидаказ меземмет ийизва, бязибурук квай нукьсанар хъел текъведай рахшандрин куьмекдалди винел акъудзава. Адан шиирри кIелзавайбуруз девирдик квай пехирар къалурзава, абур русвагьуниз эвер гузва.
Лагьана кIанда, Жамидинан виридалайни хъсан эсерар дуьньядин, Урусатдин ва Дагъустандин халкьарин чIалариз элкъуьрнава, алай вахтундани жуьреба-жуьре газетрани журналра чапзава.
Межлисдин сергьятра аваз Жамидинан яратмишунрин алемдикай, шаирдиз хас ерийрикай чпин фикирар РД-дин писателрин Союздин председатель Мегьамед Агьмедова, лезги писателрин секциядин регьбер Владик Батманова, литературоведар Гьажи Гашарова, Гьаким Къурбана, Дагъустандин халкьдин писателар Марина Агьмедовади, Шейит-Ханум Алишевади, Бийке Кулунчаковади, Абдуселим Исмаилова, Лезги радиодин къуллугъчи, таржумачи Муминат Гьуьсейновади, “Лезги газетдин” кьилин редактор Мегьамед Ибрагьимова, композитор Аида Жафаровади, “Дагъустан” ГТРК-да лезги вещанидин кьилин редактор Наира Рамазановади, Шииратдин театрдин директор Елена Гьаруновади ва масабуру лагьана.
Махачкъаладин мектебрин ученикри, ДГУ-дин филологиядин факультетдин студентри хайи чIалал кIелай шиирар, лезгийрин машгьур манидарар тир Наира Рагьмановадини Адиля Хаметовади ва “Суна чан” ансамблди (худ.рук. — Пакизат Рагьимханова) тамамарай манияр мярекатдин иштиракчийри хушдиз кьабулна.
Эхирдай Жамидинан лентиниз къачунвай сесинихъ яб акална.
Агьмед Магьмудов
