Алкьвадрикай рахадайла, чи фикирдиз сифте нубатда алимар тир Гьуьсейноврин тухумдин векилрин тIварар къведа. Гьа са вахтунда и хуьр намуслу зегьметчийрин, чешнелу хизанрин маканни я. 8-Мартдин вилик квай йикъара завай зегьметдин ветеран Мислимат Алияровадин тIвар еке гьуьрметдивди кьаз жеда.
Яшар 90 йисалай алатнавай адаз зегьметдин дад фад акуна. Гьеле 14 йисни тамам тахьанваз, ада колхозда кIвалахиз башламишна. Мегьрибан и дишегьлиди саки 52 йисуз зегьмет чIугуна. “Алкадарский” совхозда саки 300 гектарда багълар кутуник, гьар йисуз емишрин бул бегьерар кIватI хъувуник М.Алияровади вичин лайихлу пай кутуна.
1990-йисара совхозда арендадин къайдада салан майваяр (помидорар) битмишариз башламишна. М.Алияровади 5 йисан муддатда 1 гектардин участок арендада къачуна, ана помидорар гьасилна. И участокдай чилин ва зегьметдин къадир авай дишегьлиди гьар йисуз 50-60 тонн помидорар кIватI хъийиз хьанай.
— Гьикьван лагьайтIани, абур инсанар кIвалахдик квай, чIугур зегьметди арадал гъайи бегьерди, нетижайри рикIерик шадвал кутадай йисар тир, — лугьузва М.Алияровади.
Яргъал йисарин намуслу зегьметдай Мислимат Алияровадиз Зегьметдин Баркалладин орден, “Намуслу зегьметдай”, “Зегьметдин ветеран” медалар, пятилеткайрин зарбачивилин, соцсоревнованида гъалиб хьайивилин знакар, 20-далай виниз гьуьрметдин грамотаяр ганва. Адакай 15 йисуз хуьруьн Советдин депутат хьана.
Зегьметда бахт жагъай Мислимат Алияровадиз хуьре-кIвале, жемятдин арада еке гьуьрмет ава. Ам хуьруьн агъсакъалрин советдин член, жегьилрин насигьатчи ва меслятчини я.
Хазран Кьасумов
