Мукьвара Россиядин МЧС-дин Дагъустан Республикада авай Сулейман-Стальский, Хив, Кьурагь ва Агъул районрин ОНД-дин ва ПР-дин (отдел надзорной деятельности и профилактической работы) начальниквиле Велимурадов Заур Багафендиевич тайинарна.
Сулейман-Стальский райондин администрацияда Россиядин МЧС-дин Дагъустан Республикада авай ОНД-дин ПР-дин Управленидин начальникдин заместитель, къенепатан къуллугъдин подполковник Эльдар Хамамов ва райадминистрациядин кьилин 1-заместитель Лацис Оружев цIийиз тайинарнавай отделдин начальник, къенепатан къуллугъдин капитан Заур Велимурадовахъ галаз гуьруьшмиш хьана.
Л.Оружева винидихъ тIварар кьунвай районра идалай вилик кIвалах авур ОНД-дин ва ПР-дин начальник В.Керимхановаз чухсагъул ва З.Велимурадовахъ цIийи къуллугъдал агалкьунар хьана кIанзавайди лагьана.
Гуьруьшдал Лацис Оружеван, Эльдар Хамамован ва Заур Велимурадован арада агьалияр гъавурда тунин кIвалах тухуникай, цIаяр кьунрин вилик пад кьуникай, муниципалитетрин кьилерихъ, районрин маса къурулушрихъ галаз алакъа мягькемаруникай, образованидин, социальный хилен объектра кьетIен гьалар арадал атай дуьшуьшра махсус къуллугърин пешекаррини агьалийри гьерекатар алакъалу авуникай ва вилик акъвазнавай маса везифайрикай гегьенш рахунар кьиле фена.
Хазран Кьасумов
