Хъсан чешне я

Донбассдин мулкар Украинадин миллетбазрикай азадзавай СВО-дин иштиракчийри эхиримжи гьафтейра къазанмишзавай гъалибвилери Россиядин вири халкьар шадарзава. Неонацистрин гъиляй ахкъудзавай гьар са хуьр, шегьер махсус серенжем эхирдиз къвезва лагьай чIал я.

Россиядин Яракьлу Къуватрин кьушунрин гъалибвилерик дагъустанвийри, гьа гьисабдай яз Кьурагь райондин векилрини кутазвай пай гъвечIиди туш. И мукьвара райондин администрациядин кьил Замир Азизов махсус серенжемдай отпускдиз хтанвай­ Жалал Алибеговахъ галаз гуьруьшмиш хьана. Гуьруьшда райондин физкультурадин, спортдин ва жегьилрин крарин рекьяй управленидин начальник, Россиядин «Чун санал ала» проектдин райондин штабдин регьбер Рамиз Рамазановани иштиракна.

Ж.Алибегова райондин регьбердиз махсус серенжем кьиле физвай гьалдикай, вилик эцигзавай тапшуругъар дагъустанвияр тир офицерри, аскерри дирибашвилелди, жуьрэтлувилелди тамамарзавайдакай, чи ватандашар — Россиядин игитар махсус серенжемда авайбуруз хъсан чешне тирдакай лагьана.

— Зун Россиядин Яракьлу Къуватриз жуван хушуналди, икьрар кутIунна, фейиди я, — алава хъувунва викIегь аскерди. — Зи хейлин юлдашри махсус серенжемда иштиракзавай. Абур авай чкада зунни хьун лазим тир. Ватандиз герек макъамда, гьукуматди эвер гайила, жаваб гьикI гудач! Зун хьтинбур махсус серенжемда агъзурралди ава. Отпуск куьтягь хьанмазди, зунни абурун патав хъфида.

Замир Азизова дирибаш аскердиз Ватандиз намуслувилелди къуллугъ авунай  сагърай лагьана, гъалибвал гваз, сагъ-саламатдиз хтун алхишна.

Юбилейдин шабагьар

Афгъанистандай советрин кьушунар ахкъудайдалай инихъ 35 йис тамам хьун уьлкведа и вацра гегьеншдиз къейдна. Жуьреба-жуьре мярекатар чи республикадани кьиле тухвана.

Кьурагь райондин администрациядин кьил Замир  Азизова, РД-дин зегьметдин ва яшайишдин  рекьяй вилик финин министерстводин районда авай комплексный центрадин директор Эльбрус Гьажиева Афгъанистандин  вакъиайрин 16 иштиракчидив юбилейдин медалар вахкана. Райондин физкультурадин, спортдин ва жегьилрин крарин рекьяй управлениди абуруз рикIел аламукьдай пишкешар гана.

— Интернациональный буржи тамамариз, Афгъанистандиз куьмек гуз фейи куьне моджахедрихъ, террористрихъ галаз ви­кIегьдаказ женгер тухвана, командиррин тап­шуругъар уьтквемвилелди кьилиз акъуд­на. Бязи чи кьегьалар, гьайиф хьи, ана телеф хьана. Куь ва абурун игитвилер чна сад­­рани рикIелай алуддач. Куьн акьалтзавай несилдиз чешне я, — лагьана З.Азизова.

Хийир  Эмиров